«Weekend. Book. Vibes»: Ulttyq kitap kúni qarsańynda elde qandaı is-sharalar ótedi

ASTANA. KAZINFORM - Ulttyq kitap kúni qarsańynda demalys kúnderi el kóleminde «Weekend. Book. Vibes» ataýymen is-sharalar uıymdastyrylady, dep habarlaıdy QR Mádenıet jáne aqparat mınıstrliginiń baspasóz qyzmeti.

Atalǵan bastama kitap oqýdy nasıhattaýǵa, oqý mádenıetin qalyptastyrýǵa jáne balalar men jastardyń ádebıetke qyzyǵýshylyǵyn arttyrýǵa baǵyttalady.

Bul kúnderi respýblıka boıynsha kitaphanalarda, mádenıet oshaqtarynda jáne bilim berý uıymdarynda ashyq aspan astynda kitap oqýǵa arnalǵan alańdar, shyǵarmalar negizinde túsirilgen fılmderdiń kórsetilimderi, kitap klýbtarynyń basqosýlary, balalarǵa arnalǵan túrli baǵdarlamalar uıymdastyrylady.

Atap aıtqanda, Abaı oblysynda balalarǵa arnalǵan «Kitap oqý alańdary» aktsııasy men «Demalys pen kitap – shabyt úndestigi» atty poezııa keshi ótedi. Aqmola oblysynda «Men álemdi kitap arqyly bilemin» ádebı keshi jáne «Quiz book: Bilim báıgesi» zııatkerlik oıynyn ótkizý josparlanǵan. Aqtóbe oblysynda «Kitap – trendte!» ádebı-tanymdyq keshi ótkiziledi. Batys Qazaqstan oblysynda balalar men oqýshylarǵa arnalǵan «Kitap keıipkerleri sóıleıdi» atty is-shara uıymdastyrylady. Jetisý oblysynda «Aqyndar murasy» poezııa keshi men zııatkerlik oıyndar ótse, Qyzylorda oblysynda «Kitap – sarqylmas qazyna» oqý marafony ótkiziledi.

Osyǵan deıin Qazaqstanda Ulttyq kitap kúnine oraı kitap aptalyǵy bastalǵany týraly jazdyq.