«Weekend. Book. Vibes» ataýymen ótken is-sharalarǵa 50 myńǵa jýyq oqyrman qatysty
ASTANA. KAZINFORM – Ulttyq kitap kúnine oraı ótken kitap aptalyǵy aıasynda 18-19 sáýir kúnderi el kitaphanalarynda «Weekend. Book. Vibes» ataýymen túrli mazmundaǵy is-sharalar uıymdastyryldy.
Demalys kúnderi elimizde kitap oqýdy nasıhattaý, oqý mádenıetin damytý jáne balalar men jastardyń ádebıetke qyzyǵýshylyǵyn arttyrý maqsatynda túrli sharalar ótkizildi. Barlyq óńirde ashyq aýada kitap oqý alańdary uıymdastyrylyp, ádebı shyǵarmalarǵa negizdelgen fılmderdiń kórsetilimderi, kitap klýbtarynyń kezdesýleri jáne basqa da baǵdarlamalar usynyldy. Mysaly, Astanada «BookCrossing» kitap almasý aktsııasy ótti.
Túrkistan oblysynda kópshilik «Kóshpendiler» tarıhı-kórkem fılmin jáne «Qobylandy batyr» dıafılmin kórdi. Abaı oblysynda «Kitap oqý alańdary» aktsııasy jáne «Demalys pen kitap – shabyt úndestigi» atty poezııa keshi uıymdastyryldy. Aqmola oblysynda «Men álemdi kitap arqyly bilemin» atty ádebı keshi jáne «Quiz book: Bilim báıgesi» zııatkerlik oıyny ótkizildi.
Jetisý oblysynda «Aqyndar murasy» poezııa keshi, al Qyzylorda oblysynda «Kitap – sarqylmas qazyna» oqý marafony uıymdastyryldy. Respýblıka kóleminde jalpy 500-den astam is-shara ótkizilip, oǵan shamamen 50 myń adam qatysty. Bul sharalar oqýǵa degen qyzyǵýshylyqty arttyrýǵa baǵyttalǵan.
