«We chat» jelisiniń qaıyrymdy jandary taǵy úsh otbasyǵa kómektesti

TALDYQORǴAN. QazAqparat - «We chat»  jelisi arqyly «Qaıyrymdy jandar» eriktiler tobyn qurǵan azamattar taǵy úsh otbasyǵa kómek kórsetti. Bir aıdyń kóleminde jınalǵan qarjyny teńdeı etip, kómekke zárý adamdarǵa bólip berdi, dep habarlaıdy QazAqparat tilshisi.

«Qarjylaı qoldaýǵa ıe bolǵan úsh jannyń taǵdyry bir. Úsheýi de dertke shaldyqqan. Máselen, Kóksýlyq Aıbolat Aıdyn esimdi balanyń aıaǵy aýyryp, tósek tartyp qalǵan. Ol nebári 10 jasta ǵana. Al Muqyry aýylyndaǵy qyzdyń beli aýyrady. 16 jastaǵy qaryndasymyzǵa da shyn nıetimizben qol ushyn sozdyq.  Sarózektegi Beksultan Samsa esimdi  kishkentaı balanyń tili isinip ketken, sóıleı almaıdy. Úsheýine 136 myń teńgeden tabystadyq. Bul balalar jaıly biz áleýmettik jelilerden bildik. Tezirek saýyǵyp ketýin tileımiz», - deıdi  «Qaıyrymdy jandar» eriktiler tobynyń múshesi Jumataı Álimbekuly. 

Aıta ketý kerek, «We chat» jelisinde «Qaıyrymdy jandar» eriktiler tobynda 350-den astam adam bar. Olar ár aı saıyn aqsha jınap, keminde eki-úsh otbasyǵa kómektesýdi dástúrge aınaldyrǵan.  Jeli qoldanýshylardyń  basym bóligi 1000 teńgeden aqsha qosady eken. Kómekke muqtaj jandarǵa qol ushyn sozý, qaıyrymdylyq jasaý - toptyń basty maqsaty.

Esterińizge sala keteıik, qańtardyń ortasynda úıi órtenip, qystyń qara sýyǵynda dalada qalǵan otbasyna dál osy eriktiler toby  kómek kórsetken bolatyn. Taldyqorǵandyq Súıinbek Jumabaıdyń qolyna  olar  3,5 mln teńgeni tabystaǵan edi.