WBO Jánibek Álimhanulyna qatysty resmı sheshim shyǵardy
ASTANA. KAZINFORM – Dúnıejúzilik boks uıymy (WBO) qazaqstandyq boksshy Jánibek Álimhanulyna qatysty resmı sheshimin jarııalady, dep habarlaıdy Sports.kz.
WBO málimetinshe, uıym Jánibek Álimhanulynyń orta salmaqtaǵy álem chempıony ataǵynan óz erkimen bas tartý týraly ótinishin resmı túrde qabyldady.
– Komıtet Jánibek Álimhanulynyń WBO nusqasy boıynsha orta salmaqtaǵy álem chempıony tıtýlynan óz erkimen bas tartýyn resmı túrde qabyldaıdy. Ýaqytsha chempıon Denzel Bentlı tolyqqandy álem chempıony mártebesine kóterilip, osy ataqqa tıesili barlyq quqyqtar men mindetterdi ıelenedi. Álimhanuly buǵan deıingi tártiptik sheshimde kórsetilgen barlyq talaptardy oryndady. Onyń ekinshi orta salmaq dárejesindegi álemdik reıtıngke engizý týraly ótinishi WBO reıtıng komıtetiniń qaraýyna joldandy. Komıtet burynǵy chempıondyq mártebesi men jetistikterin eskerýi múmkin. Sonymen qatar uıym Bentlıdiń alǵashqy tıtýldyq jekpe-jegi mindetti qorǵanys pa, álde erikti qorǵanys bola ma, ony keıin anyqtaıdy. Bul sheshim túpkilikti bolyp sanalady jáne oǵan 14 kún ishinde jazbasha túrde shaǵym berýge bolady, – delingen WBO málimdemesinde.
Sondaı-aq uıym kýbalyq Ioenlı Ernandesti orta salmaqtaǵy mindetti úmitker dep jarııalady.
Eske salsaq, Jánibek Álimhanulyna qatysty dopıng daýy 2025 jylǵy 2 jeltoqsanda bastalǵan bolatyn. VADA uıymy 15 qarashada alynǵan synamadan tyıym salynǵan meldonıı preparatyn anyqtady. Sonyń saldarynan WBA chempıony Erıslandı Laramen josparlanǵan biriktirýshi jekpe-jek ótpeı qaldy.
Boksshy tyıym salynǵan preparatty ádeıi qoldanbaǵanyn aıtyp, «B» synamasyn ashýdy talap etti. Alaıda qańtar aıynda bul synama da meldonııdiń bar ekenin rastady.
Komandasynyń málimetinshe, 2025 jylǵy 7 mamyrda Jánibek Álimhanuly densaýlyǵyna baılanysty em qabyldap, quramynda meldonıı bar «Rıpronat» preparatyn qoldanǵan.
Qazaqstan kásibı boks federatsııasy sportshynyń áreketin jeńil dárejedegi abaısyzdyq dep baǵalap, ony 2025 jylǵy 2 jeltoqsannan bastap alty aıǵa jarystardan shettetken.
2026 jylǵy naýryzda IBF Álimhanulyn mindetti tıtýl qorǵaýyn ótkize almaǵany úshin orta salmaqtaǵy chempıondyq belbeýinen aıyrǵan edi. Al WBO onyń chempıondyq ataǵyn saqtap qalǵanymen, 2026 jyldyń jeltoqsanyna deıin jekpe-jek ótkizýge tyıym salǵan bolatyn.
