WBO Jánibek Álimhanulyn bir jylǵa jarystardan shettetti
ASTANA. KAZINFORM – World Boxing Organization qazaqstandyq orta salmaqtaǵy álem chempıony Jánibek Álimhanulyna tyıym salynǵan meldonıı zaty boıynsha oń nátıje kórsetken dopıng synamasyna baılanysty bir jyl merzimge jarystardan shettetý jazasyn qoldandy, dep habarlaıdy Sports.kz.
Sonymen qatar chempıondyq ataqtary sportshynyń ózinde qaldyryldy.
Shettetý merzimi ishinde qazaqstandyq boksshyǵa kez kelgen kásibı nemese kórme jekpe-jekterine qatysýǵa tyıym salynady. Orta salmaqtaǵy básekelestikti saqtaý jáne reıtıngtegi úmitkerlerdiń quqyqtaryn qamtamasyz etý maqsatynda WBO ýaqytsha chempıondyq ataq úshin jekpe-jek ótkizýge ruqsat berdi. Reıtıngtiń birinshi satysyndaǵy Denzel Bentlı ekinshi orynda turǵan Endı Saavedramen qolǵap túıistiredi.
Uıym sondaı-aq shettetý merzimi aıaqtalǵannan keıin Jánibek Álimhanuly ýaqytsha chempıonmen mindetti túrde jekpe-jek ótkizýge tıis ekenin rastady. Bul talap oryndalmaǵan jaǵdaıda uıym reglamentine sáıkes qosymsha sharalar qabyldanýy múmkin. Atalǵan sheshimge deıin aralyq kezdesý ótkizýge jol berilmeıdi.
WBO prezıdenti Gýstavo Olıverıdiń málimdeýinshe, Chempıondyq jekpe-jekter jónindegi komıtet sheshimdi biraýyzdan qabyldaǵan. Jaza merzimi 2025 jylǵy 2 jeltoqsannan bastap esepteledi. Tolyq qorytyndylar men talaptar kórsetilgen resmı qujat keıinirek jarııalanady.
Eske salaıyq, 2025 jylǵy jeltoqsan aıynyń basynda WBA chempıony Erıslandı Laramen úsh birdeı belbeý úshin josparlanǵan jekpe-jek qarsańynda qazaqstandyq sportshynyń synamasynan antıdopıng kodeksimen tyıym salynǵan meldonıı zaty anyqtalǵany belgili bolǵan edi.
Jánibek Álimhanuly WBO reıtıngisinde áli kósh bastap tur.