WBO uıymy Jánibek Álimhanulyna chempıondyq tıtýlyn qorǵaýǵa order berdi

ASTANA.KAZINFORM - WBO/IBF tujyrymy boıynsha orta salmaqtaǵy álem chempıony Jánibek Álimhanuly (15-0, 10 KO) búgingi jekpe-jeginde WBO álem chempıony tıtýlyn qorǵaıtyn boldy.

WBO uıymy jekpe-jekke bir kún qalǵanda, Jánibek-Mıhaılovıch aıqasynda qazaqstandyq boksshyǵa WBO tıtýlyn qorǵaýǵa order berdi. 

The ring basylymynyń habarlaýynsha, Jánibek jeńiske jetse, eki chempıondyq ataǵyn da saqtap qalady. Al eger jeńilis tapsa Mıhaılovıch IBF tıtýlyn ıelenip, WBO belbeýi bos qalady. 

IBF erejelerine sáıkes, eki boksshy búgin ekinshi márte salmaq ólsheýden ótti. Jánibek tarazyda 171,7 fýnt (77,6 kg) kórsetip, belgilegen lımıtten aspady. Al Andreı- 169,2 fýnt (76,7 kg) shyqty. 

Buǵan deıin habarlaǵanymyzdaı, Jánibek alǵashqy salmaq ólsheýde 159,6 fýnt (72,3 kg) boldy, al Andreı- 159,9 fýnt (72,5 kg) shyqty. 

Baspasóz máslıhatynda Jánibek qarsylasyn jeńetinine senimdi ekenin, Sıdneıde elimizdiń baıraǵyn jelbiretkisi keletinin aıtqan edi. 

Aıta keteıik, Jánibek - Andreı jekpe-jegi No Limit Boxing promoýterlik kompanııasynyń uıymdastyrýymen 4 qazan kúni Avstralııanyń Sıdneı qalasyndaǵy The Star arenasynda ótedi.

Boksshylar tek IBF álem chempıony tıtýlyn sarapqa salatyn bolǵan edi. 

Kásipqoı boks keshin qazaqstandyqtar «Qazsport» telearnasynyń tikeleı efırinen kóre alady. Eske sala ketsek, eki boksshy arasyndaǵy aıqas 13 shilde kúni Las-Vegaste (AQSh) ótýi tıis edi. Alaıda, otandasymyz salmaq qýý saldarynan esinen tanyp qalǵan bolatyn.