WBO Qanat Islamnyń jeńisine qatysty pikir bildirdi

NUR-SULTAN. QazAqparat – Dúnıejúzilik boks uıymy (WBO) qazaqstandyq boksshy Qanat Islamnyń (27-0, 21 KO) namıbııalyq Ýolter Kaýtondokvoımen (18-2, 17 KO) jekpe-jegine qatysty pikir bildirdi. Bul týraly QazAqparat Sports.kz-ke silteme jasap habarlaıdy.

Islam tóreshilerdiń biraýyzdan qabyldaǵan sheshimine sáıkes jeńimpaz atanyp, WBO International nusqasy boıynsha alǵashqy orta salmaqtaǵy chempıon beldigin saqtap qaldy.

«Islam – WBO reıtınginde 8-nómirde tur jáne odan joǵary kóterilýi múmkin. Bul Qanat úshin eń keremet boks keshi bolmasa da, ol jeńiske jetetindeı jetkilikti áreket jasady», - dep jazdy WBO.

Eske sala keteıik, qazaqstandyq kásipqoı boksshy Qanat Islam namıbııalyq Ýolter Kaýtondokvamen qolǵap túıistirip, jeńiske jetken bolatyn.

Aıqas Almaty qalasyndaǵy Balýan Sholaq atyndaǵy sport saraıynda ótti. Jekpe-jek on raýndqa sozyldy. Tóreshiler sheshimimen Qanat Islam jeńip, WBO belbeýine qol jetkizdi. Ol osylaısha 27-shi ret qarsylasynan basym túsip otyr.

Almaty qalasynyń ákimi Baqytjan Saǵyntaev boksshy Qanat Islamdy jeńisimen quttyqtady.

Aıta keteıik, qazaqstandyq Qanat Islam 2012 jyldyń 28 qyrkúıeginen beri kásipqoı boksta synǵa túsip júr. Búgingi kúnge deıin 27 jekpe-jek ótkizip, onyń barlyǵynda qarsylasynan basym tústi. Onyń 21-in nokaýtpen aıaqtaǵan.