WBC tıtýlynyń ıegeri Madııar Áshkeev jeńilip kórmegen amerıkalyqpen aıqasady
NUR-SULTAN. QazAqparat – Qazaqstandyq boksshy birinshi orta salmaqta WBC (USNBC) chempıony Madııar Áshkeev (14-0, 7 KO) 17 jeltoqsanda AQSh-tyń Kalıfornııa shtatyndaǵy Los-Andjeleste rıngke shyǵady, dep habarlaıdy QazAqparat Sports.kz saıtyna silteme jasap.
Ol esh jeńilip kórmegen amerıkalyq Charlz Konýellmen (13-0, 10 KO) judyryqtasady. Aıqas Freddı Roýchtyń Wild Card Boxing zalynda ótetin boks keshiniń basty oqıǵasy bolmaq. Jekpe-jek formaty – on raýnd.
Aıta keteıik, Áshkeev pen Konýell sharshy alańǵa 10 sáýirde shyǵýdy josparlaǵan bolatyn, biraq koronavırýs pandemııasyna baılanysty boks keshi toqtatyldy.
Madııar Áshkeev óziniń sońǵy jekpe-jegin 2019 jyldyń 9 qarashasynda Amerıkanyń Gavaıan Gardens qalasynda ótkizdi. Onda ol josparlanǵan segiz raýndtyń besinshi raýndynda argentınalyq Rodolfo Ezıkvel Martınesti (44-9-3, 16 KO) jeńdi. Konýellge keletin bolsaq, jaqynda óner kórsetti. 7 qazanda Ankasvıllde ol otandasy Vendı Týssandy (12-1, 5 KO) nokaýtqa jiberdi.
