WBC-tiń osy kúnge deıingi chempıondar reıtıngi: Golovkın qaı orynda

ASTANA. QazAqparat - Dúnıejúzilik boks keńesi (WBC) qazaqstandyq boksshy Gennadıı Golovkındi (38-1-1, 34 KO) osy kúnge deıingi orta salmaqtaǵy úzdik chempıondar ondyǵyna engizdi, dep habarlaıdy QazAqparat. 

Bul tizimde qazaqstandyq boksshynyń esimi jetinshi orynda ornalasqan.  Shýgar Reı Leonard reıtıngte birinshi tur. Alǵashqy úshtikke sonymen birge Bernard Hopkıns pen Djoı Djıardello endi. Úzdikter arasynda sondaı-aq Karlos Monson, Marvın Hagler, Nıno Benvenýtı, Emıl Grıffıt, Serhıo Martınes jáne Rodrıgo Valdes bar.

2014 jyldyń qazan aıynan bastap 2016 jyldyń sáýirine deıin Gennadıı Golovkın WBC-diń «ýaqytsha» chempıony ataǵyna ıe bolǵan edi. Al 2016 jyldyń mamyr aıynda meksıkalyq boksshy Saýl Alvares beldikten bas tartqannan keıin onyń tolyqqandy ıegeri atandy. Golovkın WBC beldigin tórt ret qorǵady. Al bıylǵy jyldyń qyrkúıeginde ótken Golovkın-Alvares rematchynan keıin tóreshilerdiń basym bóliginiń sheshimimen beldik «Kaneloǵa» qaıtaryldy.