WBC «Kanelony» reıtıngisinen alyp tastady
ASTANA. QazAqparat - Búkilálemdik boks keńesi (WBC) meksıkalyq boksshy Saýl «Kanelo» Alvaresti orta salmaqtaǵy boksshylardyń mamyr aıyndaǵy reıtıngine kirgizbedi, dep habarlaıdy «SPORTINFORM» SAA.
Meksıkalyq boksshynyń tizimnen tys qalýyna dopıng daýyna baılanysty alty aıǵa sporttan shettetilýi jáne WBC men VADA-nyń «Taza boks» birlesken baǵdarlamasyna kirmeýi sebep boldy.
WBC tujyrymynyń orta salmaqtaǵy álem chempıony - qazaqstandyq bylǵary qolǵap sheberi Gennadıı Golovkın, al ýaqytsha chempıondyq (Interim) AQSh ókili Djermall Charloǵa tıesili.
Tizimniń birinshi ornyn Denıel Djeıkobs (AQSh) ıelense, ekinshi orynda Amerıkanyń taǵy bir ókili Demetrıýs Andadre, al úshinshi satyda ırlandııalyq Djeıson Kýıglı tur. Kanadalyq Davıd Leme men polshalyq boksshy Kamıl Sheremeta úzdikter bestigin túıindedi.
