WBC Golovkınge 5 mamyr kúni óz tıtýlyn erikti túrde qorǵaýǵa ruqsat berdi
ASTANA. QazAqparat - WBC prezıdenti Maýrısıo Sýleımannyń aıtýynsha, uıym orta salmaqtaǵy álem chempıony Gennadıı Golovkınge 5 mamyr kúni óz tıtýlyn erikti túrde qorǵaýǵa ruqsat berdi, dep habarlaıdy Sports.kz.
Bul kúni GGG meksıkalyq boksshy Saýl Alvarespen kezdesedi dep josparlanǵan bolatyn, alaıda jekpe-jek «Kanelo» tarapynyń bastamasymen toqtatyldy.
«Bul boks úshin óte jaǵymsyz jańalyq, sportsúıer qaýym qarymta kezdesýdi kútken edi. Degenmen, Alvarestiń qanynan dopıng tabylý sebepterin anyqtap alý kerek. NSAC protokolǵa sáıkes áreket etýde. Retteýshi organ retinde bizdiń ustanymymyz aıqyn, osyǵan sáıkes biz chempıonǵa óz tıtýlyn erikti túrde qorǵaýǵa ruqsat berdik», - deıdi Maýrısıo Sýleıman Boxingscene.com saıtyna bergen suhbatynda.
