WBC chempıony Golovkındi Termınatorǵa teńedi

ASTANA. QazAqparat - WBC nusqasy boıynsha birinshi aýyr salmaqtaǵy álem chempıonyi Tonı Bel (29-2-1, 19 KO) alda ótetin Gennadıı Golovkın (37-0, 33 KO) men Saýl Alvarestiń (49-1-1, 34 KO) jekpe-jegine qatysty pikir bildirdi, dep habarlaıdy Sports.kz.

«Golovkın kúshi zor, myqty sportshy. Ol tek alǵa ǵana júredi. Ony Termınator dep atasańyz da bolady. Sondaı-aq, ol kez kelgen jaǵdaıǵa ıkemdi. Golovkınniń bul qasıetin baǵalamaý múmkin emes. «Kaneloda» kúshti boksshy. Onyń ústine ol myqty qorǵana alady. Sondyqtan  bul jekpe-jek óte qyzyq, tartysty bolýy kerek», - dep atap ótti brıtandyq boksshy Tonı Bel.

 Onyń sózine qaraǵanda, Golovkın upaı sany boıynsha jeńiske jetedi, áıtpese jekpe-jektiń sońyna qaraı qazaqstandyq sportshy qarsylasyn nokaýtqa jiberýi ábden múmkin.

«Meniń oıymsha, eki boksshy  alǵashqy 4 raýndta óte saq qımyldaıdy, sosyn «Kanelo» stılıstıkalyq úzdik boks úlgisin kórsetedi. Alaıda ol Golovkınniń soqqylaryna shydas bere alady ma?», -  deıdi álem chempıony.

Eske sala keteıik, 16 qyrkúıekte Gennadıı Golovkın meksıkalyq boksshy Saýl Alvarespen judyryqtasady. Osy jekpe-jekte Alvares GGG-diń tek eki ataǵy - WBA men IBF belbeýleri úshin ǵana talasady. Golovkın utylyp qalsa, onyń taǵy eki belbeýi - WBC men IBO bos qalyp, ony basqa boksshylar ózara sarapqa salady. Al qazaqstandyq boksshy jeńiske jetse, tórt belbeýine taǵy The Ring jýrnalynyń arnaıy belbeýin qosyp alady. Atalǵan basylym ony arnaıy Alvares úshin shyǵarǵan bolatyn.