WBC chempıony Álı Ahmetov salmaǵyn aýystyrmaq

ASTANA. QazAqparat - Qazaqstandyq boksshy Álı Ahmetov (13-0, 10 KO) basqa salmaq dárejesine aýysýǵa bel býǵan, dep habarlaıdy Sports.kz.

Promoýter Tom Leffler Ahmetovpen birge túsken sýretin jarııalap, boksshynyń «168 fýntta boks shyńyn baǵyndyrýdy jalǵastyrýǵa nıetti ekendigin» jazdy.

Aıta keteıik, qazaqstandyq jartylaý aýyr salmaqta jastar arasynda WBC álem chempıony tıtýlynyń (175 fýnt) ıegeri. Lefflerdiń jazbasynan Álıdiń ekinshi orta salmaqqa túskisi keletinin baıqaýǵa bolady.

Álı Ahmetov munyń aldyndaǵy aıqasyn 11 qazanda Kosta-Mesede (AQSh, Kalıfornııa shtaty) ótkizdi. Bul jekpe-jekte birinshi raýndta meksıkalyq Djovanı Haver Gomesti (18-15, 12 KO) nokaýtqa túsirdi. Ázirge sportshynyń qashan rıngke oralatyny belgisiz.