WBC chempıony Álı Ahmedov jańa salmaqta alǵashqy aıqasyn ótkizedi

ASTANA. QazAqparat - Jeńilip kórmegen qazaqstandyq kásipqoı boksshy Álı Ahmedov (13-0, 10 KO) 24 naýryz kúni rıngke oralady, dep habarlaıdy QazAqparat Sports.kz-ke silteme jasap.

Jartylaı aýyr salmaqta jastar arasynda WBC tujyrymy boıynsha álem chempıony Gollıvýd qalasyndaǵy (Kalıfornııa, AQSh) Avalon klýbynda ótetin Hollywood Fight Nights boks keshinde óner kórsetedi. Boks keshin Tom Lefflerdiń 360 Promotions promoýterlik kompanııasy uıymdastyryp otyr. BoxRec.com-nyń habaryna sensek, Álı 37 jastaǵy amerıkalyq Maık Gaımen (9-3-1, 5 KO) aıqasady. Jekpe-jek alty raýndqa josparlanǵan.

Aıta keteıik, Ahmedov ekinshi orta salmaq sanatynda alǵash ret rıngke shyqpaq bolyp otyr. Onyń buǵan deıingi barlyq jekpe-jegi jartylaı aýyr salmaqta ótken.