WBC belbeýiniń ıegeri Torǵynbek Ámirov: Jeńisimdi jerlesterime arnaımyn

QOSTANAI. QazAqparat - MTK Global promoýter kompanııasynyń altyn kelisimshartyn jeńip alǵan boksshy Torǵynbek Ámirov QazAqparat tilshisimen suhbatynda jekpe-jekteri týraly aıtyp, josparlarymen bólisti.

Kúni keshe Almatyda qazaqstandyq boksshylar tanymal MTK Global promoýter kompanııasynyń altyn kelisimshartyn jeńip alý úshin ózara baq synasty.

Týrnırde alǵashqy jeńisti Torǵynbek Ámirov (3-0, 0 KO) qanjyǵasyna baılady. Ol tóreshiler sheshimimen Álimjan Tursynovtan basym tústi. Torǵynbek Ámirov kelisimsharttan bólek, eki chempıondyq belbeýdi jeńip aldy. Olar - WBC (ABC Silver) jáne WBO Asia Pacific.

«Bul jeńisimdi jerlesterime, búkil Torǵaı óńirine arnaımyn. Arqalyq qalasy men Amangeldi aýdanyndaǵy aǵaıyndar habarlasyp, quttyqtap jatyr. Tilekshi bolǵan barlyq qazaqstandyqtarǵa alǵysym sheksiz. Sonymen qatar jekpe-jekterime daıyndap, aqyl-keńesterin aıtyp otyratyn Bolat Jumadilov, Marat Seıitmaǵambetov, Damır Ábdiresh syndy bapkerlerime rızamyn. Bul jeńis solardyń eńbeginiń tikeleı jemisi», - dep aǵynan jaryldy boksshy.

Torǵynbek Ámirov – Qostanaı oblysy Amangeldi aýdanynyń týmasy. Sportshynyń jastyq shaǵy Arqalyq qalasynda ótti. Sportqa jastaıynan qyzyǵyp, boksty janyna jaqyn tutty.

«Toǵyz jasymnan bastap bokspen aınalysamyn. Jetinshi synypqa deıin Arqalyq qalasynda bilim aldym. Keıin Qaraǵandy qalasynyń sport mektebine tústim. Ony jaqsy aıaqtap, kásibı sportshy jolyna tústik. Jetistikterimiz de jaman emes. Bastysy erinbeı eńbek etip, elimizdiń atyn álemge tanyta bilý ǵoı», - deıdi Torǵynbek Ámirov.

Sportshy MTK Kazakhstan menedjerlik kompanııasymen kelisimshartqa otyrdy. Endigi maqsat – baıraqty básekelerde el namysyn qorǵaý.