WBA jáne IBO chempıony Janat Jaqııanov jaıly ne bilemiz
ASTANA. QazAQparat - Búgin Amerıkanyń Toledo qalasynda qazaqstandyq Janat Jaqııanov (26-1, 18 KO) jergilikti boksshy Roýshı Ýorrenmen (14-1, 4KO) judyryqtasyp, WBA (Super) jáne IBO tujyrymdary boıynsha álem chempıony atandy.
Bul jeńis jerlesimizge ońaılyqpen kelmegeni belgili. Jaqııanovtyń eń qaýipti qarsylasy atanǵan Roýshı Ýorren kim? Ol búgin nege qazaq balasynyń gúrzi judyryǵyna shydas bere almady? Osy suraqtarǵa jaýap izdep kóreıik.
Qazaqstandyq kásipqoı boks sheberlerinen chempıondyq kezdesýlerge sońǵy jyldary tek Golovkın shyǵyp júr. Sondaı-aq, Beıbit Shúmenov te sondaı tıtýldyq aıqasqa shyǵyp jatady. Al osyǵan deıin kóptiń kózine túse bermegen qyzyljarlyq qyran Janat Jaqııanov WBA jáne IBO tıtýldary úshin aıqasqa túsedi degende kóptegen adamdardyń kúmánmen qaraǵany belgili. Tipti, sheteldik jankúıerler Ýorrenǵa aldyn-ala 100 paıyz jeńisti syılap úlgerdi. Ol osyndaı senimge nesimen ıe boldy?
Roýshı Ýorren birinshi ret 17 jasynda alǵashqy Olımpıada oıyndaryna qatysypty. 2004 jyly Afınyda amerıkalyq boksshy birinshi kezeńde bolashaq eki dúrkin Olımpıada chempıony qytaılyq Tszoý Shımınnen jeńilip qalsa, araǵa tórt jyl salyp, Beıjiń Olımpıadasynda koreıalyq Lı Ok Sýnnan jeńilip, birinshi raýndta jarys jolynan shyǵyp qalady. Sondaı-aq, ol úshinshi ret London Olımpıadasyna qatysyp, taǵy da jeńilistiń aşy dámin tatady. Osy sátsizdikten keıin Roýshı kásipqoı boksqa birjola bet burady.
Sol-aq eken, kásipqoı rıngte Ýorrennyń juldyzy janady. Nebári úsh jyl ishinde 14 kezdesý ótkizip, barlyǵynda jeńiske jetedi. Al on besinshi jekpe-jeginde chempıondyq tıtýl úshin aıqasady. Osy jekpe-jeginde domınıkandyq Hýan Karlos Paıonomen judyryqtasyp, ókinishke qaraı, tartysty kezdesýde Roýshı jeńilis tabady. Jeńiske jetken qarsylasy WBA jáne IBO belbeýleriniń ıegeri atanady. Biraq, araǵa bir jyl salyp, qos boksshy qarymta kezdesý ótkizip, amerıkalyq qarsylasynan ketken esesi men beldikterdi ózine qaıtaryp alady.
Al bizdiń Jaqııanov birde-bir Olımpıada oıyndaryna qatysyp kórmepti. Jaqııanov 2015 jyly kásipqoı boksta WBA nusqasy boıynsha jeńil salmaqtaǵy ýaqytsha álem chempıony ataǵyn jeńip aldy. Ol bul ataqqa Monte-Karloda ótken 12 raýndtyq jekpe-jekte qol jetkizdi. Qarsylasy WBA (Interim) tujyrymy boıynsha álem chempıony venesýelalyq Ionfres Parehon (17-1-1, 8 KO) bolatyn. Sondaı-aq, ol osy jyly WBC tujyrymynyń jańartylǵan reıtınginde Taıland tarlanbozy Sýrııan Sor Rýngvısaıdy basyp ozyp, Búkilálemdik boks keńesi (WBC) tujyrymy boıynsha álem chempıony ataǵyna talasýdan úmitkerler arasynda birinshi orynǵa shyqty. Munyń ózi qazaq boksshysynyń kásipqoı boks álemindegi ornyn aıqyndaı tústi. Sonymen qatar 2015 jyly jerlesimiz sáýir aıynyń sońynda EBU tujyrymy boıynsha jeńil salmaqta (53,5 kelige deıingi) Eýropa chempıony ataǵyn da jeńip alǵan bolatyn. Osy chempıondyq ataq úshin ótken jekpe-jekte Qazaqstan boksshysy frantsýz Karım Gýerfıdi nokaýtqa túsirgen.
ZZ laqap atymen óner kórsetip júrgen jerlesimiz jeńil salmaqta WBC Eurasia Pacific Boxing Council ataǵyn jeńip alǵan.
Janat kásipqoı boksqa 2007 jyly bet burǵan bolatyn. Sodan qazirgi ýaqytqa deıin 26 kezdesý ótkizip, 25 ret jeńiske qol jetkizdi. Onyń 18-in merziminen buryn aıaqtady.
Alaıda 2015 jyldyń sońynda azdap jaraqat alǵan ol jyldan astam ýaqyt emdelip, búgin uzaq úzilisten keıingi alǵashqy jekpe-jeginde sáttilik joldas bolyp, qarsylasynan eki birdeı tıtýyldyq ataqty tartyp aldy. Mine, osylaısha Jaqııanov kásipqoı bokstaǵy Golovkınnen keıingi ekinshi chempıonymyz boldy. Aldaǵy ýaqyttarda da aıqastary tabysty bola bersin dep tileıik.
