WBA Golovkındi Djarrod Fletchermen jekpe-jekke shyǵýǵa mindettedi
ASTANA. QazAqparat - Kásipqoı boksta WBA tujyrymy boıynsha orta salmaqtaǵy álem chempıony Gennadıı Golovkın avstralııalyq Djarrod Fletchermen jekpe-jek ótkizýi kerek. Bulaı bolmaǵan jaǵdaıda, ol chempıondyq ataǵynan aıyrylady, dep habarlady BoxingScene.com portalyna silteme jasap kazsporttv.kz.
Qazaqstandyq boksshyny ataǵyn qorǵaýǵa Dúnıejúzilik boks qaýymdastyǵy (WBA) mindettedi. 13 mamyrdan bastap 30 kún ishinde boksshylardyń ókilderi jekpe-jekti ótkizý jóninde kelisimge kelýi qajet. Osydan keıin promoýterlik saýdalasýlar jarııalanady. Al jekpe-jek 120 kúnniń ishinde ótkizilýge tıis.
Eske sala keteıik, Gennadıı Golovkın aldaǵy ýaqytta meksıkalyq Hýlıo Sezar kishi Chavespen judyryqtasýdy josparlaǵan, alaıda kelissóz toqtatyldy. Artynsha qazaqstandyq boksshynyń kelesi qarsylasy avstralııalyq Denıel Gıl bolady degen aqparat shyqty.
