Washington Times: Qazaqstan – bolashaqtyń jahandyq qarjy ortalyǵy
Washington Times sarapshysynyń paıymynsha, tikeleı shetel ınvestıtsııasy kez kelgen damýshy ekonomıkanyń ómirlik negizi sanalady. Infraqurylym men kadrlyq resýrstardy damytý, sol arqyly adamdarǵa eń qolaıly ómirlik jaǵdaı jasaý úshin elderge shetel kapıtalyn tartý qajet. Protsess qarapaıym bolmaýy da múmkin. Óıtkeni mundaı jolda Úkimetke kóptegen problemalarmen, zań ústemdiginiń jetkiliksizdiimen, jemqorlyqpen jáne kapıtaldy tıimsiz bólýmen kúresýge týra keledi.
Ortalyq Azııa – bul úlken ekonomıkalyq áleýet baıqalyp otyrǵan álemniń bir bóligi. Qytaı jańa Jibek jolyn ázirlep jatyr, paıdaly qazbalardy óndirý de órlep keledi. Degenmen, retteýshi ınstıtýttardy, kapıtal naryǵy, sottar men normatıvtik-quqyqtyq aktilerdi qosa alǵanda «óńirdiń materıaldyq emes ınfraqurylymy» kemeline jetken dep aıtýǵa kelmeıdi.
Maqala avtorynyń pikirinshe, Qazaqstan «Astana» halyqaralyq qarjy ortalyǵyn qurý arqyly tikeleı shetel ınvestıtsııasyn tartýǵa bar kúshin salyp jatyr. Bıyl jáne keler jyly «Eır Astananyń», munaı-gaz alyby «QazMunaıGazdyń» jáne ulttyq temir jol júıesiniń aktsııalary osynaý damýshy kapıtal naryǵyna ornalastyrylatyn bolady. Avtordyń atap ótýinshe, Qazaqstannyń jáne óńirdiń kóptegen kompanııalary aktsııalaryn jarııa ornalastyrý múmkinshiligin qarastyrý ústinde.
«Astana» halyqaralyq qarjy ortalyǵy Eýrazııadaǵy eń birinshi aǵylshyn sotymen jáne arbıtraj ortalyǵymen maqtana alady. Ol qyzmetin aǵylshyn tilinde júzege asyrady jáne qazirdiń ózinde Ulybrıtanııanyń quqyqtaný salasyndaǵy eń bilikti mamandaryn jaldap otyr.
Sondaı-aq avtor qazaq álipbıiniń kırıllıtsadan latynǵa kóshirilýi, jahandyq kommýnkatsııalardy jaqsartýǵa baǵyttalǵan bastamalar men «Astana» halyqaralyq qarjy ortalyǵynyń biregeı geografııalyq ornalasýy Qazaqstanǵa shetelden kapıtal tartý umtylysynda tabysqa jetýge múmkindik beretindigin atap ótedi.
