Warner Bros. Discovery 20 naýryzda Netflix-pen birigý máselesin daýysqa salady

ASTANA. KAZINFORM – Warner Bros. Discovery (WBD) kompanııasy Paramount Skydance-pen kelissózderdi qaıta bastaǵanyn málimdedi. Stýdııaǵa yqtımal mámile sharttaryn jaqsartý úshin bir apta ýaqyt berildi, dep habarlaıdy Kazinform.

Bul týraly kompanııanyń resmı málimdemesinde aıtylǵan.

Buǵan deıin WBD Paramount usynǵan bir aktsııa úshin 30 AQSh dollary kólemindegi satyp alý usynysyn qabyldamaǵan edi. Alaıda endi 23 aqpanǵa deıin sharttardy qaıta qaraýǵa múmkindik berildi. Derekkózderdiń málimetinshe, Paramount basshylyǵy baǵany 31 dollarǵa deıin kóterýge daıyn ekenin jetkizgen. Osylaısha dırektorlar keńesin mámileni qaıta talqylaýǵa kóndirý kózdelip otyr.

Soǵan qaramastan WBD aktsıonerlerge jeltoqsan aıynda kelisilgen Netflix kompanııasymen jasalǵan mámileni qoldaýdy usynýdy jalǵastyryp otyr. Atalǵan kelisimniń jalpy quny 82,7 mlrd dollardy quraıdy. Ol strımıng servısin, kınostýdııany jáne HBO kabeldik arnasyn satýdy kózdeıdi.

Mámileni maquldaý máselesi 20 naýryzǵa belgilengen aktsıonerlerdiń kezekten tys jınalysynda daýysqa salynady.

Eske sala keteıik, 5 jeltoqsanda Netflix Warner Bros.-ty bir aktsııasy úshin 27,75 dollar baǵamen satyp alatynyn málimdegen. Bul usynys shamamen 72 mlrd dollardy qurasa, kompanııanyń jalpy baǵalanýy 82,7 mlrd dollarǵa jetken.

Qańtar aıynda Netflix mámile sharttaryn qaıta qarap, satyp alýdy tolyqtaı aqshalaı formatta júzege asyrý týraly sheshim qabyldady. Buǵan deıin aralas tólem úlgisi – qolma-qol qarajat pen aktsııalar usynylǵan bolatyn.