Walmart jelisi Kanadada «Visa» kartalaryn qabyldaýdan bas tartty
ASTANA. QazAqparat - Álemdegi iri bólshek saýda jelilerin basqaratyn amerıkalyq «Walmart» dúkender jelisi Kanadada «Visa» tólem kartasyn qabyldaýdan bas tartty. Bul týraly senbide kanadalyq «CBC» telearnasy habarlady.
Buǵan Kanadada tranzaktsııa júrgizý úshin komıssııa stavkasy tym joǵary ekendigi sebep bolǵan.
«Kanadada Visa kartasy túrine qaraı alynǵan jıyn 2,5 paıyzǵa deıin jetedi», delingen resmı málimdeme.
Al, «Visa» ınternet saıtynda Kanadada tranzaktsııa úshin jıyn eń tómen ekeni jáne 1,42 paıyzdan 2,08 paıyzǵa deıin ǵana túrlenip otyratyny aıtyldy. Walmart Visa-men kelissóz barysynda «bul jaǵdaıdy retteıtinine» senim bildirdi.
Walmart jelisiniń kúlli álem boıynsha 11,5 myń dúkeni bar, Kanadada olardyń 400-ge jýyǵy ornalasqan.
