WADA sportshylarǵa COVID-19 qarsy vaktsına egýdi tabandy túrde usynady
Bıylǵy jazda Tokıoda ótetin Olımpıada oıyndarynda dopıngke tapsyratyn test oń nátıje kórsetý múmkin dep alańdap otyrǵan sportshylardy jigerlendirgen agenttik ekpeni «óz densaýlyǵy, aınalasyndaǵy adamdar men jalpy alǵanda, Japonııa turǵyndarynyń densaýlyǵy úshin» jasatýǵa shaqyryp otyr.
«COVID-19 vırýsyna qarsy vaktsınanyń tyıym salynǵan tizimdegi qandaı da bir zattar nemese ádisterden quralǵany nemese qandaı da bir jolmen dopıngke qarsy taldaýǵa áseri bar ekenin dáleldeıtin esh málimet joq», - delingen WADA-nyń vırýsqa qatysty qujatynda.
Agenttik barlyq qoljetimdi aqparatty baqylap, óz pikiri ózgergen jaǵdaıda sportshylarǵa keńes berip, aqparattandyryp otyratynyn qosyp ótti.
Halyqaralyq Olımpıada komıteti (HOK) sportshylardy vaktsına egýge májbúrlenbeıtinin, biraq olar «nıettestikti tanytý» úshin ekpe saldyrtýy tıis ekenin málimdedi.
Brıtandyq The Telegraph gazeti ótken aıda HOK-tiń Dúnıejúzilik densaýlyq saqtaý uıymymen (DDSU) birlesip, Tokıodaǵy Olımpıada oıyndaryn ótkizý úshin oǵan qatysatyn barlyq sportshylardy vaktsınalaýdy uıymdastyryp otyrǵanyn jazdy.
«Kez kelgen vaktsına qaltyraý, ekpe salynǵan jerdiń aýyrsynýy sııaqty ýaqytsha fızıologııalyq reaktsııany týdyrýy múmkin, biraq búginde ruqsat etilgen vaktsınalardyń sportshylardyń qandaı da bir nátıjeliliginiń turaqty tómendeýine soqtyratyndyǵyna esh dálel joq», - dep málimdedi WADA.
