WADA Reseıdi Olımpıadadan tórt jylǵa shettetti
NUR-SULTAN. QazAqparat - Búkilálemdik antıdopıng agenttigi atqarýshy komıteti (WADA) komıtettiń usynysyna sáıkes biraýyzdan sheshim qabyldady. Endi aldaǵy tórt jylda Reseı Olımpıada men álem chempıonattaryna qatysa almaıtyn boldy. Sonymen qatar, úlken halyqaralyq týrnırlerdi de ótkize almaıdy, dep habarlaıdy VVS.
WADA erejesine sáıkes, eger ulttyq antıdopıng agenttigi statýsynan aıyrylsa, memleket halyqaralyq jarystardy ótkizý quqynan aıyrylady.
Reseılik sportshylar ózderiniń dopıng qabyldamaǵanyn dáleldeı alsa, halyqaralyq jarystarǵa beıtarap tý astynda shyǵýǵa múmkindikteri bar.
Búkilálemdik antıdopıng agenttigi atqarýshy komıtetine jiberilgen qujattarda 2012-2015 jyldar aralyǵyndaǵy Reseı sportshylarynyń synaqtary týraly aqparattar saqtalǵan bolatyn, bul kezeńge, mysaly, Sochıde ótken Olımpıada oıyndary sáıkes kelip tur. Mekemedegiler antıdopıngtik erejelerdi saqtaýǵa qatysty tekserýdi sońyna deıin jetkizý úshin aqparattardy suratqan edi. Eger bazadan keıbir reseılikterdiń dopıng qabyldaǵany týraly málimetter tapqanda – jalpy el emes, belgili bir sportshylar ǵana jaýapkershilikke tartylar edi.
WADA komıteti Reseıdi dopıngke qatysty málimetterge manıpýlıatsııa jasady dep aıyptaýda.
Bazadan júzdegen dopıng-test týraly málimetter óshirilgen. Keıbir nátıjeler 2015-2016 jyldary joıylǵan. Keıbir manıpýlıatsııalar ótken jyldyń jeltoqsan aıy men osy jyldyń qańtar aıynda oryn alǵan. Bul kezde zerthanada sarapshylar jumys isteýi kerek edi. Qujattardyń merzimderi manıpýlıatsııany bildirmes úshin ózgertilgen. Kem degende 145 reseıliktiń antıdopıng erejelerin buzǵany tekserý barysynda áshkerelendi.
