WADA Qazaqstannyń dopıngke qarsy zerthanasyna akkredıtatsııasyn qaıtarýy múmkin

NUR-SULTAN. QazAqparat – Mádenıet jáne sport mınıstri Aqtoty Raıymqulova elimizde dopıngke qarsy sharalardy kúsheıtý jumystary qalaı júzege asyrylyp jatqanyn aıtyp berdi, dep habarlaıdy QazAqparat tilshisi.

«Dopıng qoldanatyn sportshylar men bapkerlerge, basshylarǵa ákimshilik jáne tártiptik jazalar qataıdy. Ol boıynsha dıskvalıfıkatsııalaý, aqshalaı syıaqyny qaıtaryp alý, Olımpıada jeńimpazdaryna berilgen turǵyn úıdi qaıtaryp alý, materıaldyq qamtamasyz etý tólemderin toqtatý, sporttyq ataqty qaıtarý sekildi sharalar qoldanylady. Sportshyǵa dopıng taǵaıyndaǵandarǵa 200 AEK kóleminde aıyppul salynady. Sport salasyndaǵy bıýdjetten tys qarajatty taratý boıynsha biryńǵaı operator taǵaıyndaldy», - dedi Aqtoty Raıymqulova OKQ alańy arqyly halyq aldynda esep berý kezdesýinde.

Aqtoty Raıymqulova 2016 jyldan bastap sportshylardyń dopıngke qarsy zerthanasy Dúnıejúzilik antıdopıng agenttiginiń (World Anti-Doping Agency — WADA) akkredıtatsııasynan aıyrylǵanyn málim etti.

«Mádenıet jáne sport mınıstrligi Ulttyq olımpıada komıtetimen birlesip, ony qalpyna keltirý boıynsha aýqymdy jumys atqardy. Qazirgi tańda zerthana aýmaǵy 1700 sharshy metrlik jańa ǵımaratqa kóshirildi. WADA standartyna saı jańa qurylǵylar alyndy. Birlesken jumystyń arqasynda zerthana WADA akkredıtatsııalary qalpyna keltirilýi múmkin tizimge endi», - dedi Aqtoty Raıymqulova.