WADA dopıng úshin qylmystyq jaýapkershilik engizýdi qoldamaıdy
ASTANA. QazAqparat - Dúnıejúzilik dopıngke qarsy agenttik (WADA) tyıym salynǵan zattardy qoldanǵan sportshylarǵa qylmystyq jaýapkershilik engizýdi qajet dep sanamaıdy, dep habarlaıdy QazAqparat TACC agenttigine silteme jasap.
Degenmen, WADA atletterdi dopıng qoldanýǵa úgittegen nemese tyıym salynǵan dári-dármekterdi taratqan tulǵalardy jazalaýǵa baǵyttalǵan zańdardy qoldaıdy.
«WADA ár memlekettiń óz azamattary úshin zańdardy ornatý egemendi quqyǵyna aralaspaıdy, bul árbir eldiń aıryqsha jeke quqyǵy. Sportshylarǵa keler bolsaq, agenttik shettetilgen sportshylardyń Lozannadaǵy Sporttyq arbıtrajdyq sotyna qaıta shaǵymdaný quqyǵyn qamtıtyn - sanktsııalyq úderisterdiń ózi jetkilikti dep esepteıdi. WADA júrgizgen kóptegen quqyqtyq konsýltatsııalar kórsetkendeı, sportshylardy ekiden tórt jylǵa deıin jarystardan shettetýdiń ózi laıyqty jaza bolyp tabylady. Osylaısha, WADA dopıng qoldanǵan sportshylardy qylmystyq jaýapkershilikke tartý qajet emes dep esepteıdi, ol úshin sporttyq qozǵalysta qandaı da bir alǵysharttar da joq», - delingen WADA-nyń habarlamasynda.
Buǵan deıin habarlaǵanymyzdaı, Qazaqstan Respýblıkasynyń Mádenıet jáne sport mınıstrligi dopıng úshin sportshymen qatar, osy úderiske qatysy bar barlyq komandaǵa qylmystyq jaýapkershilik engizýdi qarastyryp otyrǵanyn málimdegen edi.
Al Parlament Májilisiniń depýtaty, Olımpıada chempıony Serik Sápıev dopıng úshin qylmystyq jaýapkershilik engizý usynystarymen asyqpaýǵa shaqyrdy.
