WADA 2020 jyly sportshylar úshin tyıym salynǵan zattardyń tizimin jarııalady
NUR-SULTAN. QazAqparat – Dúnıejúzilik dopıngke qarsy agenttik óziniń resmı saıtynda 2020 jylǵa tyıym salynǵan preparattar men ádisterdiń tizimin jarııalady, dep habarlaıdy QazAqparat.
Tártipke sáıkes, qujat kúshine engenge deıin úsh aı buryn jarııalanady. Bul, sportshylar men olardyń ortasy kez kelgen ózgeristermen aldyn ala tanys bolýy úshin jasalady.
«WADA 2020 jyly sportshylar úshin tyıym salynatyn zattardyń tizimin jarııalaıdy. Jyl saıyn jańartylatyn tizim álemniń barlyq antıdopıngtik ınstıtýttary arasynda uzaq ýaqyt talqyǵa salynady. Bul, naryqqa enip úlgergen nemese klınıkalyq ázirlený satysyndaǵy dopıng-yqtımaldylyǵy bar barlyq jańa zattar men ádisterdi tyıym salynǵan zattar tizimine engizý úshin jasalatyn keshendi protsess. Mundaı áreket jalpy sportty ǵana emes, álemdegi barlyq sportshylardyń densaýlyǵyn saqtap qalýǵa múmkindik beredi», - dedi WADA bas dırektory Olıve Nıgglı.
WADA resmı saıtynda málim etilgendeı, jańa zatty nemese ádisti tizimge engizý úshin WADA sarapshylary olardy úsh krıterııdiń kem degende ekeýine sáıkestigin anyqtaýy kerek.
Naqtylanǵan tizimdi 2019 jyldyń 23 qyrkúıeginde WADA Atqarýshy komıteti bekitti. Ol 2020 jylǵy 1 qańtarynda kúshine enetin bolady.
