Wabtec kompanııasy Qazaqstandaǵy lokomotıvter óndirisin ulǵaıtady jáne servıstik qoldaýyn kúsheıtedi

ASTANA. QazAqparat - QR Premer-Mınıstri Álıhan Smaıylov pen Wabtec kompanııasynyń aǵa vıtse-prezıdenti Gohan Baıhan seriktestikti keńeıtý perspektıvalary men mashına jasaýdaǵy jańa jobalardy iske asyrý jaıyn talqylady.

Bul týraly QazAqparat Úkimettiń resmı saıtyna silteme jasap habarlaıdy.

Kezdesý barysynda Úkimet basshysy mashına jasaý el ekonomıkasynyń eń perspektıvaly sektorlarynyń biri ekenin atap ótti. Ótken jyly elimizde saladaǵy óndiris kólemi 35%-ǵa ósti.

«Biz osy salanyń odan ári ósýi men damýy úshin úlken áleýetti kórip otyrmyz, bul jańa ınvestıtsııalar men zamanaýı tehnologııalardyń aǵynyn talap etedi. Osyǵan baılanysty Wabtec kompanııasynyń elimizdegi óndiris protsesin keńeıtý nıetin quptaımyz», – dedi Álıhan Smaıylov.

Onyń aıtýynsha, ekonomıkalyq kúızelisterge qaramastan, álemdik temirjol qatynasy turaqty bolyp qala beredi jáne aldaǵy 10 jylda eki esege jýyq ósedi dep boljanýda. Osyny eskere otyryp, Qazaqstan óziniń tıimdi geografııalyq ornalasýyn barynsha tıimdi paıdalanýǵa jáne tranzıttik júk aǵyndaryn baılanystyratyn iri kólik toraptarynyń birine aınalýǵa nıetti.

Atap aıtqanda, Eýropa men Azııa elderi arasyndaǵy taýar aınalymynyń qarqyndy ósýi aıasynda Transkaspıı halyqaralyq kólik baǵytyn damytýdyń perspektıvasy joǵary. Ol úshin ınfraqurylymdyq shekteýlerdi alyp tastaý, sondaı-aq lokomotıvter men teńiz kemeleriniń parkin ulǵaıtý qajet.

Óz kezeginde Gohan Baıhan Wabtec kompanııasy Astanadaǵy lokomotıvter shyǵaratyn zaýytta óndiristi keńeıtýge qarajat salǵanyn habarlady, bul onyń qýatyn eki esege arttyrýǵa múmkindik beredi.

Sonymen qatar onyń aıtýynsha, kompanııa lokalızatsııany tereńdetý, «jasyl» ınnovatsııalardy engizý, servıstik qyzmet kórsetýdi damytý jáne óńirdiń basqa elderine eksportty ulǵaıtý jumystaryn jalǵastyrady. Wabtec sonymen qatar Qazaqstannyń kólik jelisiniń tıimdiligin arttyrý úshin temirjol baǵyttaryn tsıfrlandyrý jáne ońtaılandyrý máselesinde QTJ-men belsendi yntymaqtastyq ornatady.

Álıhan Smaıylov kelissózder qorytyndysy boıynsha Úkimet ózara belsendi is-qımyldy jalǵastyrýǵa jáne kompanııanyń jańa ınvestıtsııalyq josparlaryn iske asyrý úshin qajetti qoldaý kórsetýge daıyn ekenin atap ótti.

Anyqtama: Wabtec – 1999 jyly Westinghouse Air Brake Company (WABCO) men MotivePower Industries korporatsııasynyń birigýinen qurylǵan amerıkalyq kompanııa. Ol lokomotıvterge, júk jáne jolaýshylar kólikterine arnalǵan ónimder shyǵarady, sondaı-aq qýaty 6 myń attyń kúshi bar zamanaýı lokomotıvter jasap shyǵarady.