Vzvod serjanttaryn jańa baǵdarlama boıynsha oqytady

ASTANA. QazAqparat - Qorǵanys mınıstrligine qarasty Kadet korpýsynyń bazasynda áskerdegi vzvod serjanttarynyń biliktiligin arttyrý kýrstary ótýde. Qazirgi kezde 40-tan astam serjant oqýda, túrli býyn boıynsha atalǵan kýrsta jalpy 500 serjantty oqytý josparlanyp otyr, dep habarlaıdy QR QM baspasóz qyzmeti.

Oqytý kýrsynyń merzimi bir aı. Osy ýaqyt aralyǵynda vzvod serjanttary kásibı deńgeıin, biliktiligin arttyryp, atqaratyn laýazymy aýqymynda áskerı bilimi men mashyqtanǵan daǵdylaryn tolyqtyrýy tıis. Qarýly kúshterdiń bas serjanty - QR QK BSh Serjanttar quramymen jumys jónindegi basqarmasynyń bastyǵy sheber-serjant Temirbek Halyqov atap ótkendeı, ústimizdegi jyly vzvod serjanttarynyń kýrsy jańa, jetildirilgen baǵdarlama arqyly júrgiziledi.

Baǵdarlamaǵa serjanttar korpýsynyń qurylýy men damýy, jetekshilik etý, keńes berý, daıarlyq ádistemesi men sabaqtar júrgizý jáne basqa da taqyryptar engizildi. Kásibı armııa ahýaly jalpy elimizdiń Qarýly kúshterin ári qaraı damytýdyń basym baǵyttarynyń biri bolyp tabylatyndyqtan oqytý baǵdarlamasy serjanttar korpýsynyń ókilderin jan-jaqty damytýǵa arnaldy. Atalǵan kýrstyq daıarlyq áskerı qyzmetshilerdi kásibı turǵyda oqytý túri bolyp sanalady.

Búgingi tańda Qarýly kúshterdiń serjanttar korpýsy úshin: serjanttardyń bazalyq kýrsynan bastap rota, batareıa, batalon men dıvızıon, shtab, brıgada, baza jáne polk serjanttarynyń kýrstaryna deıingi 7 deńgeı qarastyrylǵan. Oqytýdyń bul túri oqý-jattyǵý ortalyqtary men áskerı bólimderde, QR QM Kadet korpýsynda jáne joǵary áskerı oqý oryndarynda júrgiziledi.