Vıacheslav Lokshın: Balalardy erikti vaktsınalaý – qajet shara

NUR-SULTAN. QazAqparat – Qazaqstannyń reprodýktıvti medıtsına qaýymdastyǵynyń prezıdenti, professor Vıacheslav Lokshın balalardy erikti vaktsınalaýdyń qajet shara ekenin aıtady, dep habarlaıdy QazAqparat tilshisi.

«COVID-19 indeti áýelde ásirese egde jastaǵy adamdarda aýyr ótse, keıingi kezde balalardyń aǵzasyna da keri áserin tıgizýde. Balalar arasynda COVID-19 indeti árqalaı ótip jatyr. Aýyr jaǵdaılary da bar, «kavasakı sındromy» da kezdesip otyr, qantamyrlardyń qyzmeti buzylýda. Sondyqtan, óte tez beıimdelgish indettiń aldyn alatyn jalǵyz jol vaktsınatsııa bolyp tur. Budan álemdi vaktsına ǵana qutqara alady», - degen maman búginde kóptegen elde balalar men 15-ten asqan jasóspirimderdi vaktsınalaı bastaǵanyn eske saldy.

«Qytaıda tipti 3-ten asqan balalardyń bárin vaktsınalap jatyr. AQSh pen Izraıl 12 jastan bastap vaktsınalaýǵa kóshti. Bul turǵyda eshqandaı bir erekshe táýekel joq ekenin aıtý kerek. Óıtkeni qoldanylyp jatqan vaktsına adam aǵzasynda synaqtan ótken. Onyń ishinde júkti áıelderge de salyndy. Jer sharynda ondaǵan myń bala vaktsına qabyldap úlgerdi. Keıbir elderde osy jastaǵy balalardyń jartysy ekpe aldy. Árıne, vaktsınatsııa ata-analardyń ruqsatymen júrgizilýi kerek. Vaktsına aýrýǵa shaldyqpaýdyń nemese aýrýdy ońaı ótkerýdiń jalǵyz joly ekenin túsiný kerek. Sondyqtan balalar men jasóspirimderdi erikti vaktsınatsııalaý óte qajet», - dedi Vıacheslav Lokshın.