Vıacheslav Lokshın: Ár vaktsına adamǵa salynbas buryn jiti zertteýden ótken

ÓSKEMEN. QazAqparat – Qazaqstanda koronavırýs pandemııasymen kúres jónindegi «El úshin egilemin» azamattyq shtabynyń múshesi, akýsher-gınekolog Vıacheslav Lokshınniń aıtýynsha, ár vaktsına adamǵa salynbas buryn jiti zertteýden ótken, dep habarlaıdy QazAqparat tilshisi.

«Ókinishke qaraı, halyq arasynda koronavırýs vaktsınasynyń jóndi tekserilmegendigi, synaqtan ótpegendigi jaıly sóz tarap júr. Azamattardy mundaı alyp-qashpa áńgimelerge senbeýge shaqyramyn. Qandaı vaktsına bolmasyn adamǵa salynbas buryn jiti zertteýden ótedi. Belgili bir aýrý túrine ekpe jasaý uzaq ýaqytty qajet etpeıdi. Máselen, adenovırýs vektoryna negizdelip jasalǵan «Spýtnık V» ekpesinde COVID-19 ınfektsııasynyń bólshekteri bar. Ol óli vırýs adam aǵzasyna túsken kezde antıdene qalyptastyrady», - dedi Vıacheslav Lokshın.

Vaktsınany áýeli jan-jaqty synaqtardan ótkizedi. Janýarlarǵa salyp, zertteý jasalady. Bári oıdaǵydaı bolyp jatsa erikti azamattarǵa egilip, tekseriledi. Tek sodan keıin ǵana vaktsına jappaı halyqqa salyna bastalady.

«Búgingi tańda álem boıynsha 2 mlrd adam koronavırýsqa qarsy vaktsına alǵan. Sondyqtan el turǵyndaryn da tasada qalmaı, óziniń jáne jaqyndarynyń densaýlyǵy úshin durys sheshim qabyldaýǵa shaqyramyn. Tek ekpe arqyly ǵana koronavırýsty jeńip, burynǵy ómirge orala alamyz», - dedi akýsher-gınekolog.