Vıacheslav Banşıkov Almaty zoobaǵynyń basshysy qyzmetinen ketedi
ALMATY. QazAqparat - Vıacheslav Banşıkov Almaty zoobaǵynyń basshysy qyzmetinen ketedi. Bul týraly zoobaqtyń baspasóz qyzmeti málimdedi, dep habarlaıdy QazAqparat tilshisi.
«Bul sheshimime qaramastan men zoobaqtyń demeýshisi bolyp qala beremin. Bastalǵan jobalardy aıaǵyna deıin jetizýge jaýapty bolamyn. Zoobaq basshylyǵyna kelgeli beri, ózimniń jumysym jaıly oń pikirlerdi kóp estidim. Biraq búginde balalarǵa arnalǵan júıeli áleýmettik kómek berý tetigin qurǵym keledi. Ómirdiń qıyn synaǵyna túsken balalar men otbasylarǵa ataýly áleýmettik kómek, «Shetsiz qala» jobasynyń aıasynda qala keńistikterin abattandyrýdy qolǵa alǵym keledi. Men osy baǵytta kóbirek jetistikke jeterime senimdimin», - dedi ol.
Aıta ketý kerek, Vıacheslav Banşıkov zoobaq basshylyǵyna 23 mamyrda kelgen bolatyn. Osy ýaqyt aralyǵynda 230 mln teńge kóleminde demeýshilik qarajat tartylǵan.
Aıta ketý kerek, sońǵy 3 aıda Almaty zoobaǵynda 6 birdeı janýar ólgen bolatyn.
Sonyń nátıjesinde zoobaqtyń birneshe qyzmetkeri jumystan qýyldy.
