VVS radıosynda qazaq mýzykasy shyrqaldy
NUR-SULTAN. QazAqparat – BBC Radio 3 brıtan radıostantsııasynda qazaq mýzykasy shyrqaldy. Mundaı qýanyshty habarmen Facebook-te belgili radıojúrgizýshi Jadyra Jumakúlbaı bólisti, dep habarlaıdy QazAqparat tilshisi.
«Týra Ata zańnyń tól merekesi kúni BBC radio 3-ke arnap jasaǵan qazaq mýzykasy týraly «Music Planet: Road Trip» habarym áýe tolqynyna shyqty. Osyndaı múmkindikti bergen, birinshiden, Allaǵa myń da bir shúkir. Ekinshiden, senip tapsyrǵan BBC-lik áriptesterime, dáneker bolǵan Qazaqstannyń Ulybrıtanııa koroldigi/Londondaǵy elshiligine, arnaıy Áıgerimge, aǵylshynsha úırenip, habar jasaı alatyn deńgeıge jetýime múmkindik bergen Elbasymyz Nursultan Nazarbaevtyń «Bolashaq» baǵdarlamasyna myń alǵys», - dep jazdy ol óz paraqshasynda.
«Music Planet: Road Trip» habarynda Jadyra Jumakúlbaı qazaq mýzyka óneri, ulttyq aspaptar jaıly baıan etedi. Qazaq án óneriniń Arqa, Syr, Jetisý mektebi baryn aıtady. Habardy tolyǵymen myna siltemeden tyńdap, júktep alýǵa bolady.
Sonymen birge, atalmysh radıohabar týraly Ulybrıtanııadaǵy Qazaqstan elshiligi de Facebook paraqshasynda bólisip, qazaq mýzykasyn tyńdaýǵa shaqyrdy.
Aıta ketsek, BBC Radio 3 - tyńdarman qaýymǵa klassıkalyq mýzyka men opera týyndylaryn, djaz ben álemdik mýzykalardy sýsyndatatyn álemdik radıostantsııa. Radıostantsııa ózin álemge «jańa mýzykanyń eń salmaqty komıssary» retinde tanystyrady. BBC Radio 3 barlyq ulttardyń mýzykasyn álemge pash etýdi kózdeıdi.
