VVS: Álemde jylyna 400 mıllıon tonna qaǵaz qoldanylady
NUR-SULTAN. QazAqparat - «Kompıýterler, smartfondar men elektrondy kitap dáýirinde gazetter men kitaptardyń dáýreni ótti dep oılasańyz –qatelesesiz. Sebebi, qaǵaz óndirisi gúldenip jatyr», dep jazady VVS.
Maqala avtorynyń aıtýynsha, búginde álemde jylyna 400 mıllıon tonna qaǵaz qoldanylady.
«Aqsha, karton qorapshalar, túbirtek, tamaq pisirýge arnalǵan qaǵaz, jumyrtqa qaǵazy, quttyqtaý ashyqhattary jáne taǵy da basqa usaq-túıeksiz ómirdi elestetý múmkin bolmaı ketti. Biz qolma-qol aqshasyz qoǵamǵa qaraı aıaq basqanymyzben, qaǵazsyz qoǵamdy elestetý múmkin emes», - dep jazady ol.
Aıtylyp ótkendeı, búkil álem boıynsha qaǵazǵa degen suranys artqan.
«Búgingi kúni biz birrettik plastmassadan bas tartyp jatqandyqtan, onyń ornyn almastyrýǵa negizgi úmitker qaǵaz bolyp otyr. Sońǵy jyldary kóp sala ókilderi qaǵaz paketterge kóshti. Degenmen, shyn máninde qaǵaz qanshalyqty turaqty? Onyń qorshaǵan ortaǵa qandaı áseri bar?», - deıdi avtor.
Onyń sózinshe, qaǵaz óndirýdiń ár satysy sýdy qajet etedi.
«Óndiris salasy sýdy óte kóp mólsherde qajet etedi. Bir ǵana A4 qaǵazyn daıyndaý úshin 2-13 lıtr sý qajet. Qaǵaz óndirisi boıynsha birinshi orynda turǵan Qytaıda bir jylda qaǵaz óndirýge úsh trıllıon lıtr sý ketken», delingen maqalada.
Qaǵaz óndirisi kóp energııany da qajet etetin bolyp shyqty.
«Zertteý nátıjeleri kórsetkendeı, álemdik qaǵaz óndirisi jylyna 6,4 ekzadjoýl (EDj) energııany tutynady. Bul, 87 trıllıon kese shaı qaınatýǵa jetetin energııa. Sonymen qatar álemdik qaǵaz óndirisi úshin jylyna 100 mıllıon gektar orman kesiledi», dep jazady VVS.
Búginde qaǵaz qaldyq retinde emes, tek taýar retinde qarastyrylady. Degenmen, onyń ekologııaǵa áserin de eskerý kerek.
