Výchıch Serbııadaǵy parlament saılaýynda óz blogynyń jeńilgenin moıyndady
ASTANA. KAZINFORM — Serbııanyń burynǵy prezıdenti Aleksandar Výchıch kezekten tys parlament saılaýynda ózi basqaratyn «Aleksandar Výchıch — Birikken Serbııa» saılaý blogynyń jeńilgenin málimdedi.
Report agenttiginiń habarlaýynsha, Serbııa progressıvti partııasynyń saılaý shtabynda sóılegen Výchıch daýys berýdiń túpkilikti nátıjesi áli belgisiz ekenin, alaıda qolda bar derekter óz blogynyń jeńilip jatqanyn kórsetetinin aıtty.
Onyń sózinshe, «Stýdentter tizimi» 135-140 depýtattyq mandatqa ıe bolýy múmkin. Al ózi basqaratyn tizim shamamen 105 mandat alady dep boljanǵan.
— Ázirge túpkilikti nátıje joq. Kópshilik tańǵalatyn bolady. Sonda keıbir adamdardyń qanshalyqty ótirik aıtyp, ne nárseni oıdan shyǵarǵanyn túsinesizder. Blokadaǵa qatysqan stýdentterdiń tizimi jeńiske jetkenin habarlaǵym keledi. Olar 135-140 mandat alady, al bizde shamamen 105 mandat bolady, — dedi Výchıch.
Ol parlamentte Voevodına vengrleriniń odaǵy da ókildik etetinin atap ótti.
Výchıch óz saıası kúshiniń kúresin jalǵastyratynyn jáne oppozıtsııada bolýdyń ne ekenin kórsetetinin aıtty.
Buǵan deıin Aleksandr Výchıch 27 qyrkúıekte kezekten tys parlament saılaýyna qatysyp, premer-mınıstr qyzmetine úmitker bolý úshin otstavkaǵa ketkenin málimdegen bolatyn.
