Vý áýesqoı boks Olımpıada oıyndarynyń qatarynda bolmaıdy degenderge jaýap berdi
ASTANA. QazAqparat - Halyqaralyq áýesqoı boks qaýymdastyǵynyń prezıdenti Chıng-Kýo Vý áýesqoı boks Olımpıada oıyndarynyń baǵdarlamasynan alynady degenderge jaýap berdi, dep habarlaıdy QazAqparat tilshisi.
Esterińizde bolsa osyǵan deıin BAQ betterinde áýesqoı boks Olımpıada oıyndarynyń baǵdarlamasynan alynyp tastalatyn boldy dep jazylǵan bolatyn. Oǵan basty sebep - Halyqaralyq áýesqoı boks qaýymdastyǵy dopıng tekseristi ótkizbeýi bolyp otyr. 2014 jyly bir márte boksshylardyń synamasy alynsa, 2015 jyly múldem tekseris bolmaǵan. Bul ereje buzýshylyq dep sanalyp, boks Olımpıada baǵdarlamasynan alynyp tastalýy múmkin degen boljamdar jasalǵan edi.
Alaıda AIBA prezıdenti Chıng-Kýo Vý sheteldik basylymdarǵa bergen suhbatynda áýesqoı boks Olımpıada oıyndarynyń baǵdarlamasynan alynbaıtynyn aıtty.
«Boks - Olımpıada oıyndarynyń mańyzdy bóligi. Eshkimniń de boksty Olımpıada baǵdarlamasynan alyp tastaıyq deýge quqy joq. Boks Olımpıada oıyndarynyń baǵdarlamasynynan alynbaıdy, bul jáı ǵana qaýeset. 2024 jylǵy Olımpıada oıyndarynda boks baǵdarlamada bolady. AIBA prezıdenti retinde bul alyp qashpa sózge senbeýlerińizdi suraımyn», - dep jazady Chıng-Kýo Výdyń sózin «Rıa Novostı».
