VTB Biryńǵaı lıgasy: «Astana» basketbolshylary estonııalyqtarǵa ese jiberdi
ASTANA. QazAqparat - «Astana» prezıdenttik klýby VTB Biryńǵaı lıgasynyń turaqty chempıonaty aıasynda estonııalyq «Kalev» komandasymen kezdesti, dep habarlaıdy «QazAqparat» tilshisi.
Qyzyqty ári tartysty ótken match nátıjesinde jeńis parket ıeleri - «Kalev» klýbyna buıyrdy, esep - 104:74.
Aıta keteıik, Tallın qalasynyń basketboldan kásibı erler klýby chempıonattyń 11 márte jeńimpazy jáne Estonııa kýbogynyń birneshe dúrkin ıegeri bolyp tabylady.
19 oıynnan keıin VTB Biryńǵaı lıgasynyń kestesinde «Astana» - besinshi, «Kalev» segizinshi orynda tur.
Lıga aıasyndaǵy kezekti matchyn elordalyq klýb óz úıinde Belarýstiń «Tsmokı-Mınsk» komandasyna qarsy ótkizedi.
Oıyn 17 naýryz kúni «Saryarqa» velotreginde ótedi. Bastalýy - saǵat 20.00.
Atalmysh kezdesý aldynda «Astana» Almatyǵa attanyp, el chepıonaty aıasynda jergilikti komandamen oınaıdy. Match 13 jáne 14 naýryz kúnderi ótedi. Qazaqstan chempıonatynda barlyǵy 7 klýb óner kórsetýde. Astanalyqtar 56 upaımen - birinshi orynda, almatylyqtar 44 upaımen úshinshi orynda keledi.
Avtory: Elaman Turysbekov
