«Vremıa» gazetinde mazmundalǵan faktiler boıynsha azamattardyń habarlamalaryna komıssııalyq tekserý júrgiziletin bolady
ASTANA. 1 aqpan. QazAqparat - Qazaqstan Respýblıkasynyń Premer-Mınıstri Kárim Másimovtiń tapsyrmasy boıynsha 31 qańtar kúni Densaýlyq saqtaý mınıstri Salıdat Qaıyrbekovanyń «Vremıa» gazetiniń tilshisi Vıktor Býrdınmen kezdesýi boldy.
QR Densaýlyq saqtaý mınıstrliginiń baspasóz qyzmeti habarlap otyrǵandaı, elimizdegi azamattardyń densaýlyǵyn saqtaý salasynyń aǵymdaǵy jaǵdaıy jáne damý perspektıvasyna qatysty suraqtar boıynsha ashyq dıalog boldy.
Mınıstr maqalada aıtylǵan máseleler jáne densaýlyq saqtaý júıesin ári qaraı jetildirý maqsatynda Úkimet atqaryp jatqan is-sharalar týraly áńgimeledi.
Atap aıtqanda, S. Qaıyrbekova aýrýlardy anyqtaý jáne emdeý salasynda joǵary tehnologııalardy endirý, tegin medıtsınalyq kómektiń kepildendirilgen kólemi aıasynda turǵyndarǵa medıtsınalyq qyzmet kórsetýge qatysatyn jeke menshik emhanalardyń sanyn arttyrý, medıtsınalyq qyzmetkerlerdiń biliktiligin kóterý barysy, mamandardy kásibı úzdiksiz damytý ortalyǵynyń jumysy jáne shetelderde oqytý jóninde áńgimeledi.
Mınıstr sondaı-aq, kórsetiletin qyzmet sapasyna baqylaý júıesin qatańdatý jáne medıtsına salasynda sybaılas jemqorlyq qylmystarmen kúresti kúsheıtýge baǵyttalǵan is-sharalarǵa toqtaldy.
Sonymen qatar, ana men bala ólim-jitimin azaıtý sharalaryn júzege asyrý máseleleri qozǵaldy. 2010 jyly qabyldanǵan is-sharalar nátıjesinde ana ólim-jitimi - 38,3 paıyzǵa, náreste ólim-jitimi - 8,2 paıyzǵa tómendegeni aıtyldy.
«SQ-Farmatsııa» JShS Bas dırektory Syzdyq Baımuqanov jýrnalıstke dári-dármek jáne medıtsınalyq maqsattaǵy quraldardyń qoryn qalyptastyrý jáne satyp alý mehanızmderi týraly aıtty.
Jýrnalıst V.Býrdınniń maqalasynda keltirilgen faktiler jáne atalǵan máseleler boıynsha azamattardyń habarlamalaryna komıssııalyq tekserý júrgizetin jumys komıssııasy qurylyp, nátıjesi Premer-Mınıstrge baıandalatyn boldy. Komıssııany Densaýlyq saqtaý mınıstrliginiń Medıtsınalyq jáne farmatsevtıkalyq qyzmetti baqylaý komıtetiniń tóraǵasy Nazarbek Beısen basqarady. «Vremıa» gazetiniń jýrnalısine atalǵan komıssııanyń jumysyna qatysý usynyldy.
Densaýlyq saqtaý mınıstriniń «Vremıa» gazetiniń tilshisi Vıktor Býrdınmen áńgimelesý stenogrammasy Densaýlyq saqtaý mınıstrliginiń www.mz.gov.kz veb-saıtyna ornalastyrylady.
