VR Meksıka shyǵanaǵyndaǵy apat úshin 7,8 mlrd dollar tóleıdi
ASTANA. 4 naýryz. QazAqparat - Brıtandyq munaı alpaýyty VR jáne Meksıka shyǵanaǵyna munaı tógilýinen zardap shekkender 7,8 mıllıard dollar ótemaqy týraly kelisim jasasty, dep habarlady Bı-Bı-Sı. VR kiris deńgeıi jóninen munaı kompanııalarynyń arasynda álemde úshinshi oryn alady.
Budan buryn senbi kúni VR ókilderi men 2010 jyly Deepwater Horizon platformasynda bolǵan apattan keıin kompanııany sotqa bergen talapkerler sotqa deıin ózara kelisimge kelgen bolatyn.
Іs boıynsha sýdıa Karl Barber budan buryn keıinge ysyrylǵan úderis «taraptardyń jańa ustanymdaryna» oraı taǵy de keıinge qaldyrylýy múmkin dep habarlady.
VR ókili tólemder buryn qurylǵan 20 mıllıard dollar kólemindegi ótemaqy qorynan ótelýi yqtımal degendi aıtty. Kelisimniń basqa jaı-japsary jarııalanǵan joq.
Búgingi tańda tazalaý jumystaryna jáne ótemaqy retinde VR 7,5 mlrd. dollardy tólep úlgirgen.
Talapkerler arasynda 100 myńnan astam adam bar, olardyń kópshiligi munaı tógilýinen bıznesinen aırylǵan balyqshylar men jaǵalaýdy munaıdan tazartqan jumysshylar.
Jańa tólemderdi brıtandyq korporatsııadan basqa Halliburton sýbmerdiger-kompanııasy men Transocean munaı munarasy operatory bólisýi múmkin.
2010 jylǵy sáýirde jarylys kezinde 11 adamnyń ómirin qıyp ketken uńǵyny bitep, munaı aǵýyn toqtatýǵa 85 kún qajet boldy.
Prezıdent Barak Obama munaı tógilýin el tap bolǵan aýyr ekologııalyq apat dep atady.
