Pýtın: «Rosatom» Qazaqstanmen birge jańa aýqymdy jobalardy iske asyrýǵa daıyn

ASTANA. KAZINFORM – Reseı Federatsııasynyń Prezıdenti Vladımır Pýtın «Kazahstanskaıa pravda» gazetinde jarııalanǵan maqalasynda «Rosatom» korporatsııasy Qazaqstannyń atom energetıkasyn damytýǵa atsalysa alatynyn aıtady.

Reseı basshysynyń Astanadaǵy kezekti saparynyń qarsańynda jarııalanǵan maqalada eki eldiń energetıka salasyndaǵy baılanysy tolyq qamtylǵan. 

«Munaı-gaz sektoryndaǵy yntymaqtastyq ta syndarly sıpat alǵan. Kaspıı qubyr konsortsıýmynyń arqasynda Qazaqstan eksporttaıtyn munaıdyń 80 paıyzdan astamy Reseı aýmaǵy men Reseıdiń porttary arqyly, Qara teńizben shetel naryǵyna jetkizilip otyr. Qos memlekettiń energetıkalyq kompanııalary kómirsýtek ken oryndaryn birlesip ıgerip, energııa resýrstaryn óńdeýdi, qubyr júıesin keńeıtýdi jolǵa qoıa bildi», - dep jazady V.Pýtın.

Onyń paıymdaýynsha, qorshaǵan ortany qorǵaý, klımattyń ózgerýine qarsy kúres baǵyttarynda da yntymaqtastyqtyń jarqyn keleshegi bar.

«Rosatom» Qazaqstanǵa ıadrolyq otyn tizbeginiń jobalaryn iske asyryp, ýran ónerkásibin damytýǵa tájirıbelik turǵydan kómek kórsetip keledi. Mamandarynyń bilim-biligi men tehnıkalyq sheshimderi álemde teńdessiz sanalatyn atalmysh memlekettik korporatsııa Qazaqstan tarabymen jańa aýqymdy jobalardy iske asyrýǵa daıyn», - dep oı qorytady Reseı prezıdenti.

Vladımır Pýtın Soltústik – Ońtústik halyqaralyq kólik dálizi men «Báıterek» ǵaryshtyq zymyran keshenin qurý jobasyn ózara ekonomıkalyq yntymaqtastyqtyń keleshegi zor baǵyttary retinde ataǵan.

Eske sala keteıik, buǵan deıin Prezıdenttiń shaqyrýymen Vladımır Pýtın Qazaqstanǵa memlekettik saparmen keletinin jazǵan bolatynbyz. Osy oraıda, elimizdiń bedeldi basylymdarynyń biri — «Kazahstanskaıa pravda» gazetinde maqalasy jarııalanyp, irgeles memleket basshysy eki el arasyndaǵy yntymaqtastyq týraly oıyn jetkizdi.