Voıteh Fılıp: Qazaqstan - Chehııanyń negizgi saıası seriktesi
NUR-SULTAN. QazAqparat – Eýrazııa elderi parlamentteri tóraǵalarynyń IV Keńesinde Chehııa Depýtattar palatasynyń vıtse-spıkeri Voıteh Fılıp parlamentaralyq yntymaqtastyqty ornatýdyń mańyzdylyǵy týraly aıtty, dep habarlaıdy QazAqparat tilshisi.
Onyń sózine qaraǵanda, Chehııa tarapy Qazaqstandy Ortalyq Azııadaǵy negizgi saıası jáne ekonomıkalyq seriktes retinde qarastyrady.
Sonymen qatar ol byltyr naýryz aıynda QR Parlamenti Májilisiniń tóraǵasy Nurlan Nyǵmatýlın Chehııaǵa saparmen barǵanyn eske saldy. Al bıyl qazan aıynda Chehııa Respýblıkasy Parlamenti depýtattar palatasynyń tóraǵasy Radek Vondrachektiń Qazaqstanǵa resmı sapary josparlanyp otyr.
«Parlamentaralyq baılanystardyń tetikteri óte mańyzdy dep sanaımyn. Sebebi bul baǵyttaǵy yntymaqtastyq lańkestik, ekstremızm sekildi jahandyq syn-tegeýrinder men qaterlerge qarsy turýǵa kerek. Kópjaqty parlamentaralyq yntymaqtastyq memleket pen halyq arasynda ózara túsinistikti qamtyp, dıalog úshin qolaıly jaǵdaı jasaıdy. Osyǵan baılanysty halyqaralyq ári óńirlik turaqtylyqtyń jahandyq ornyqty damýy úshin qolaıly jaǵdaılardy qurý maqsatynda kópeldik yntymaqtastyqtyń mańyzdylyǵyn moıyndaı alamyz», - dedi V. Fılıp.
Aıta keteıik, búgin elordada Eýrazııa elderi parlamentteri tóraǵalarynyń IV Keńesinde Túrkııa Respýblıkasynyń Uly Ulttyq Jınalysynyń Spıkeri Mustafa Shentop parlamenttik dıplomatııany damytý taqyrybyn kóterdi.
Budan buryn habarlanǵandaı, elordadaǵy Táýelsizdik saraıynda «Úlken Eýrazııa: Dıalog. Senim. Seriktestik» taqyrybynda Eýrazııa elderi parlamentteri tóraǵalarynyń IV Keńesi jumysyn bastady.
Forým jumysyna Eýropa men Azııanyń 65 eliniń parlamentteri delegatsııalary, 14 halyqaralyq parlamenttik uıym ókilderi qatysýda. Olardyń qatarynda EQYU men UQShU parlamenttik assambleıalary, Parlamentaralyq odaq, Azııa parlamenttik assambleıasy, Halyqtyń qonystanýy jáne damýy jónindegi parlamentarıılerdiń Azııalyq forýmy, Eýropalyq parlament, Azııadaǵy ózara is-qımyl jáne senim sharalary keńesi, Islam yntymaqtastyq uıymy parlamenttik odaǵy, TMD PAA, ShYU syndy uıymdar bar.
