«Vostoktsvetmet» pen «Qaztsınktegi» apat boıynsha tergeý júrip jatyr
ASTANA. KAZINFORM – Tótenshe jaǵdaılar mınıstri Shyńǵys Árinov óndiristik apattardyń týyndaý qaýpi men sonyń saldarynan bolatyn adam ólimin azaıtý sharalary týraly baıandady.
Atap aıtqanda, ónerkásiptik qaýipsizdik sharalary nyǵaıtylyp, óndiristik baqylaýǵa, kásibı avarııalyq-qutqarý qyzmetterin attestattaýǵa qoıylatyn talaptar kúsheıtildi, tozǵan jabdyqty ýaqytyly jańartý josparyn kelisý mindeti belgilengen.
– Elimizdiń qaýipti óndiristik oryndardaǵy adam ólimi 3 esege, jaraqat alý 25%-ǵa azaıdy. Jyl basynan beri 5 aıda baqylaýdaǵy obektilerde 43 oqıǵa men 12 avarııa tirkeldi, onyń ishindegi 10-y boıynsha tergeý júrgizildi, – dedi Sh. Árinov Úkimettiń búgingi otyrysynda.
Sonymen birge, mınıstr jumysshylar qaza bolǵan «Vostoktsvetmet» shahtasynda jáne «Qaztsınk» zaýytynda oryn alǵan eki iri avarııa boıynsha tergeý júrip jatqanyn aıtty. Beıindi sarapshylardyń qatysýymen tıisti saraptamalar men zertteýler taǵaıyndaldy.
– Aldyn ala boljam boıynsha «Vostoktsvetmet» shahtasynda oryn alǵan avarııaǵa, taý-ken jumystaryn jobalyq qujattama talaptaryn buzyp júrgizý jáne jumys óndirisiniń tıisti deńgeıde uıymdastyrylmaýy sebep bolǵan. Al Qaztsınk zaýytyndaǵy jarylys tehnologııalyq protsestiń buzylýy saldarynan oryn aldy degen boljam bar, – dedi sala mınıstri.
Buǵan deıin osy obektilerde tehnıkalyq qujattamalarǵa
saı kelmeý, tehnıkalyq qurylǵylardyń merzimin uzartý saraptamalarynyń bolmaýy, jobalyq qujattamadan aýytqý, óndiristik baqylaýdyń álsizdigi, sondaı-aq tozǵan jabdyqty ýaqytyly aýystyrmaý sııaqty ónerkásiptik qaýipsizdik talaptarynyń buzylýy anyqtalǵan.
Tergeý aıaqtalǵan soń kásiporyndarǵa qatysty tıisti sharalar qabyldanady.
Aıta keteıik, búgin Úkimet jumys ornyndaǵy qaýipsizdik máselesin qarastyryp jatyr.
