«Vooksrossing» jobasy aıasynda mektepterge 15 myń dana kitap tapsyryldy

Joba aıasynda respýblıkalyq áskerı mektep oqýshylaryna qazaq, orys jáne aǵylshyn tilinde jazylǵan 300-den astam kitap danalary tapsyryldy, dep habarlaıdy QazAqparat Nazarbaev Zııatkerlik mektebiniń baspasóz qyzmetine silteme jasap.

Respýblıkalyq «Jas Ulan» áskerı mektebinde uıymdastyrylǵan is-sharada jınalǵan qonaqtarǵa jas sarbazdar jáne Astana qalasyndaǵy Zııatkerlik mekteptiń oqýshylary arnaıy daıarlanǵan kontserttik baǵdarlama usynyldy. Onda sahnada óner salǵan oqýshylar kelgen qaýymdy aldymyzdaǵy aıtýly mereıtoı - Qazaqstan Respýblıkasy Táýelsizdiginiń 25-jyldyǵymen quttyqtap shyqty.

"Ómirimizde qıyn máselelerdi sheshý barysynda, aldymenen jaqyndarymyzdyń tájirıbesine súıenip suraqtarǵa jaýap izdeımiz. Al odan soń ózimiz unatatyn kitap keıipkeri qalaı jasar edi dep oı-tolǵaý júrgizemiz. Óıtkeni ádebıet paraqshalarynda árdaıym ómirde kezdesetin mańyzdy suraqtarǵa jaýap tabylady. Kitap oqý barysynda dúnıetanymymyz keńeıip, ómirlik tájirıbemiz jınaqtalady. Bıyl biz bul jobany áskerı mektepterden bastaǵanymyz kezdeısoq emes. Óıtkeni bul mekteptiń ustazdary jáne biz osynda oqyp jatqan balalar, ıaǵnı keleshektegi Otan qorǵaýshylarymyz, Qazaqstan armııasynyń bedeldi azamattary bolyp ósýine tilektespiz. Elimizdiń tynysh bolǵany Sizderdiń arqanyzda. Bizben birigip jumys jasap, qoldaǵanyńyz úshin úlken alǵysymyzdy bildiremiz. Sizderge tabys tilep, osynda jınalǵan barshalaryńyzdy Táýelsizdigimizdiń 25 jyldyǵymen shyn júrekten quttyqtaımyn!", - dedi «Nazarbaev Zııatkerlik mektepteri» derbes bilim berý uıymynyń Basqarma tóraıymy Kúlásh Shámshıdınova.

Kelesi quttyqtaý sózi Ulttyq qorǵanys ýnıversıtetiniń general-maıory Ashat Ryspaev pen áskerı mekteptiń basshysy, polkovnık Muhtar Maıkeevke berildi. Olar Zııatkerlik mektepter basshylyǵyna alǵysyn bildirip, Astana qalasyndaǵy Zııatkerlik mektepte oqýdan ótken 30-dan astam ustazdar búgingi tańda áriptesterimen tájirıbe almasyp, úırengen ádister men tásilder oqý úrdisinde keńinen qoldanys tapqanyn aıtyp ótti. Sóz sońynda Respýblıkalyq áskerı mektep basshysy, polkovnık Muhtar Jaleluly Kúlásh Noǵataıqyzyna alǵys hat pen «Jas Ulannyń» resmı tanymbelgisin tartý etti. Osy sátten bastap Nazarbaev Zııatkerlik mektepteri resmı túrde «Jas Ulan» qaýymdastyǵynyń múshesi mártebesine ıe boldy.

Kezdesýdiń ekinshi bóliminde áskerı mektep basshylyǵy mekeme boıynsha ekskýrsııa júrgizip, qonaqtardy oqý úrdisiniń ereksheligimen, ulandardyń jetistikterimen jáne general S.Q.Nurmaǵambetov atyndaǵy áskerı mektep tarıhymen tanystyrdy. Qonaqtar nazarynda mekteptegi Táýelsiz Qazaqstannyń tarıhyndaǵy mańyzdy oqıǵalaryn quraıtyn arnaıy zaly erekshe áser qaldyrdy.

Óz kezeginde Astana qalasyndaǵy Zııatkerlik mektepterdiń kitaphanashylary oqýshylar arasynda «Kitap ataýyn tap» tanymdyq oıynyn ótkizdi. Oıyn barysynda oqýshylar is-qımyl men ym arqyly tanymal kitap keıipkerlerin kórsetti.

Kitap saıahaty - Nazarbaev Zııatkerlik mektepteriniń negizgi dástúrleriniń biri. «Vooksrossing» jobasy aıasynda elimizdegi Zııatkerlik mektep qyzmetkerleri, oqýshylary jáne olardyń ata-analary aýyl jáne qalada ornalasqan jalpy bilim berý mekemelerine qazaq, orys jáne aǵylshyn tilinde jazylǵan kórkem, ǵylymı-kópshilik ádebıeti men entsıklopedııa jınaqtaryn tartý etedi. Onyń negizgi ıdeıasy - oqýshy ózine unaǵan kez kelgen bir kitapty alady, biraq ornyna basqa eki kitap ákelip qoıý tıis. Óskeleń urpaqtyń arasynda kitap oqý mádenıetin tárbıeleý, oqýǵa qyzyǵýshylyqty arttyrý maqsatymen uıymdastyrylatyn joba, Zııatkerlik mektepter arasynda iske-asyrylatyn «Qoǵamǵa qyzmet etý» jobasynyń mańyzdy bóligi bolyp tabylady. Óz kezeginde bul tájirıbe mektepter arasyndaǵy baılanysty nyǵaıtyp, elimizdiń bilim berý mekemeleriniń kitaphana qoryn tolyqtyryp, jańartady.

«Vooksrossing» áleýmettik jobasy Nazarbaev Zııatkerlik mektepteriniń jelisinde 2010 jylda bastaý alady. Osy ýaqyt ishinde elimizdegi jalpy bilim berý mekemelerine 15 000-nan astam kitap danalary tapsyryldy. Búgingi tańda Almaty qalasynyń Zııatkerlik mektepteri Almaty qalasyndaǵy áskerı mektepke osy aktsııa aıasynda sapar shekti. Demalys kúnderi Shymkent jáne Qaraǵandy mektepteriniń kitaphanalary jańa kitaptarmen tolyqtyrylady. Al jeltoqsan aıynda elimizdegi Nazarbaev Zııatkerlik mektepteriniń oqýshylary oblys pen aýdandyq aýyl mektepterine baryp, ózderi oqyǵan kitaptaryn tartý etedi. Kitaptyń ishine oqýshylar atalǵan kitap týraly oı-pikirin, alǵan áserin jazyp, kitaptyń kelesi oqyrmanyna arnaǵan usynystaryn qaldyrady. Osyndaı tájirıbe arqasynda Kitap saıahatshysynyń sóresi árqashan kitapqa tolyp, jańaryp otyrady.