Volvo avtokontserni 3000 jumys ornyn qysqartady
ASTANA. KAZINFORM – AQSh prezıdenti Donald Tramp EO-dan ákelinetin taýarlarǵa 50 paıyzdyq baj salyǵyn engizemin dep ses kórsetkennen birneshe kún ótken soń, shvedtik Volvo kompanııasy 3000 qyzmetkerdi qysqartatynyn málimdedi, dep habarlaıdy Kazinform agenttiginiń menshikti tilshisi.
Batystyq aqparat agenttikteriniń málimetinshe, Volvo kompanııasy qysqartýlardy zertteý jáne ázirleý, kommýnıkatsııalar jáne kadrlyq basqarý bólimderinde júrgizýdi josparlap otyr.
Kompanııa bul týraly dúısenbi kúni jarııalady. Bul sheshim shved avtokontserniniń óz aktsııalarynyń qunyn qalpyna keltirý jáne kólikterine suranysty arttyrý maqsatynda bıznestiń bir bóligin qaıta qurylymdap, shyǵyndardy azaıtý áreketiniń bir bóligi bolyp tabylady.
Volvo kompanııasynyń qazirgi bas dırektory Hakan Samýelsson 2022 jylǵa deıin on jyl boıy atqarǵan qyzmetine jýyrda qaıta oraldy. Ol sáýir aıynda shyǵyndardy 1,9 mıllıard dollar (18 mıllıard shved krony) kóleminde qysqartýǵa baǵyttalǵan baǵdarlama usyndy. Bul baǵdarlama aıasynda Volvo-nyń «aq jaǵalylar» sanatyna jatatyn qyzmetkerleriniń edáýir bóligi qysqartylmaq. Olar kompanııa personalynyń 40 paıyzyn quraıdy.
Volvo Cars málimdemesinde aıtylǵandaı, bul qysqartý shamamen keńse qyzmetkerleriniń 15 paıyzyna áser etedi. Sondaı-aq ol 160 mıllıon dollardy (1,5 mıllıard shved krony) quraıtyn birjolǵy qaıta qurylymdaý shyǵyndaryn týǵyzady.
Volvo Cars-tyń jańa qarjy dırektory Fredrık Hansson Reuters agenttigine bergen suhbatynda bul qysqartý barlyq bólimsheler men fılıaldarǵa áser etetinin, olardyń kópshiligi Geteborg qalasynda oryn alatynyn aıtty.
— Bul bizdiń qurylymdy tıimdirek etý úshin jasalyp otyr. Bul sharalar ár aımaqta ártúrli jolmen júzege asýy múmkin. Biraq biz barynsha uqypty áreket etemiz, — dedi Hansson.
Aıta keteıik, bul qysqartý týraly málimdeme AQSh prezıdenti Donald Tramptyń 1 maýsymnan bastap Eýroodaqtan keletin ımportqa 50 paıyzdyq salyq engizý týraly eskertýinen birneshe kún ótken soń jasaldy. Alaıda dúısenbi kúni ol bul kúnnen bas tartyp, Vashıngton men Brıýssel arasyndaǵy kelissózder úshin sońǵy merzimdi 9 shildege deıin uzartty.
Buǵan deıin Ford Germanııadaǵy úsh myńǵa jýyq jumys ornyn qysqartatyny habarlandy.