1 mln teńge qarjylandyrý: volonterlik bastamalarǵa arnalǵan grant baıqaýy bastaldy
ASTANA. KAZINFORM — Qazaqstan Respýblıkasy Mádenıet jáne aqparat mınıstrligi Azamattyq bastamalardy qoldaý ortalyǵymen birlesip, shaǵyn granttar baıqaýyna ótinim qabyldaý bastalatynyn habarlady.
Jeńimpazdarǵa 3 aıǵa deıingi merzimde jobany júzege asyrý úshin 1 000 000 teńgege deıin qarjylandyrý, sondaı-aq uıymdastyrýshylar tarapynan ádistemelik qoldaý kórsetiledi.
Granttar kelesi baǵyttar boıynsha beriledi:
- volonterlik bastamalardy damytý (tótenshe jaǵdaılar, ekologııa, medıtsına, mádenıet, áleýmettik baǵyt, janýarlardy qorǵaý) – 60 grant;
- ınklıýzıvti qoǵamdy damytý – 18 grant;
- aýyldyq jerlerdi damytýǵa arnalǵan bastamalar – 18 grant.
Ótinimder 2026 jylǵy 13 sáýirden 30 sáýirge deıin qabyldanady.
Baıqaýǵa kelesi úmitkerler qatysa alady:
- tirkelgen úkimettik emes uıymdar (ÚEU);
- volonterlik jobalar boıynsha bastamashyl toptar;
- volonterlik jobalar boıynsha 18 jastan asqan jeke tulǵalar.
Tolyq aqparat Azamattyq bastamalardy qoldaý ortalyǵynyń www.cisc.kz saıtynda («Granttar» → «Shaǵyn granttar» bólimi) ornalastyrylǵan. Munda baıqaý sharttary men uıymdastyrýshylar týraly málimet te berilgen.
Baıqaýdy granttyq jobalardy júzege asyryp jatqan úkimettik emes uıymdar uıymdastyrýda.
Eske sala keteıik, ótken jyly 136 shaǵyn grant aıasynda belsendi azamattar men ÚEU óz jobalaryn tabysty túrde júzege asyrdy. Nátıjesinde elimiz boıynsha 10 myńnan asa azamatqa naqty kómek kórsetilip, 500-den astam is-shara uıymdastyryldy.
Jobalar aıasynda 5 myń aýyl turǵyny qamtylyp, 1 myńnan astam múgedektigi bar azamat kásip ıgerip, jańa múmkindikterge qol jetkizdi. Sonymen qatar 4 myńnan astam adam volonterlik qyzmet, alǵashqy kómek kórsetý, tótenshe jaǵdaılarda áreket etý jáne qarttarǵa kútim jasaý daǵdylaryn meńgerdi.
Volonterlerdiń belsendi qatysýymen 400-ge jýyq erikti arheologııalyq ekspedıtsııalar jumysyna tartylyp, tarıhı-mádenı mura nysandarymen júıeli jumys júrgizildi. Sondaı-aq veterınarlyq kómekke muqtaj 352 janýar qamtylyp, ekologııalyq aktsııalar ótkizilip, 1 tonnadan astam qoqys qaldyǵy jınaldy.
Eske sala keteıik, buǵan deıin volonterlik qyzmet konstıtýtsııalyq deńgeıde bekitiletini aıtyldy. Bul týraly Konstıtýtsııalyq reformalar jónindegi komıssııanyń H otyrysynda Konstıtýtsııalyq sot tóraǵasynyń orynbasary Baqyt Nurmuhanov aıtqan edi.
