Volonterlik qyzmet konstıtýtsııalyq deńgeıde bekitiledi – Konstıtýtsııalyq komıssııa
ASTANA. KAZINFORM – Volonterlik qyzmet konstıtýtsııalyq deńgeıde bekitiledi. Bul týraly Konstıtýtsııalyq reformalar jónindegi komıssııanyń H otyrysynda Konstıtýtsııalyq sot tóraǵasynyń orynbasary Baqyt Nurmuhanov aıtty.
- Ótken otyrysta áriptesterimiz naqty usynystar engizgen bolatyn. Sonymen qatar azamattar men uıymdardan, ǵalymdar men zańgerler qaýymdastyǵynan birqatar joldanym kelip tústi. Olar shyn mánde mańyzdy máselelerge qatysty. Osyǵan baılanysta Konstıtýtsııa jobasyna jańa normalar qosymsha qarastyryldy. Qazaqstanda volonterlik qozǵalys belsendi damyp keledi. Komıssııa músheleri jáne volonterlik uıymdar eldiń shynaıy patrıottary, jasampaz ári ózekti máselerge beı-jaı qaramaıtyn jastar qoǵam ıgiligi úshin eńbek etip jatqanyna nazar aýdardy. Bıyl búkil álemde Buqaralyq volonterler jyly retinde atalyp ótýde. Ózderińizge belgili, bul bastamany Memleket basshysy BUU Bas assamblıasynyń 75-sessııasynda jarııa etken bolatyn, - dedi ol.
Onyń aıtýynsha, komısııa qaraýyna volonterlik qyzmetti konstıtýtsııalyq deńgeıde bekitý týraly usynystar túsken. «Volonterlik qyzmet týraly» Zańdy jáne azamattardyń aqysyz, erikti kómeginiń muqtaj adamdarǵa qajettigin, qorshaǵan ortany qorǵaýdaǵy mańyzyn esker otyryp, bul usynys qoldaý tapty.
- Jobanyń 31-babynyń 2-tarmaǵyna «Qazaqstan Respýblıkasynda erikti áleýmettik saqtandyrý, ózge de qamsyzdandyrý túrleri, volonterlik qyzmet pen qaıyrylymdylyq qoldaý tabady» degen tolyqtyrý engizildi. Bastamashylyrdyń pipikirinshe, bul ıdeıa jobanyń basqa erejelerin, ásirese Preambýlany jáne Qazaqstan Respýblıkasy qyzmetiniń negiz quraýshy qaǵıdattaryn qısyndy túrde tolyqtyrady. Olardyń qataryna jaýapty ári jasampazdyq, otanshyldyq ıdeıasyn ilgeriletý, qoǵamdyq dıalogty damytý, eńbek súıgishtik qundylyqtaryn bekitý, joǵary ekologııalyq mádenıetti qalyptastyrý jáne basqalary bar, - dedi Baqyt Nurmuhanov.
Aıta keteıik, Konstıtýtsııalyq reforma jónindegi komıssııanyń IX otyrysy 7 aqpan kúni ótti. Onda Memlekettik keńesshi Erlan Qarın nelikten jańa Konstıtýtsııa qabyldaý qajet ekenin túsindirdi.