Volonterlikke úlken júrek, taza nıet kerek - Baǵdat Anarbaeva
Búgin Volonterler lıgasynyń Almaty bólimshesiniń tóraǵasy Baǵdat Anarbaeva qaıyrymdy jandardyń kúndelikti jumysy qalaı bastalatynyn aıtty.
Ádette biz BAQ kózderinen qansha otbasy azyq-túlik sebetin alyp jatqan statıstıkasyn ǵana kóremiz.
Al oǵan deıin qoraptyń qalaı jınalatyny, qalaı jetkiziletini, bul jumysty kimder jasaıtynyn bile bermeımiz.
Jalpy Qazaqstan Volonterler lıgasynda 10 myń volonter jumys isteıdi. Almatyda 2 myńǵa jýyq volonter tirkelgen. Karantın kezinde muqtaj otbasylarǵa azyq túlik sebetin jetkizýge 51 erikti jumyldyrylǵan.
Olardyń ishinde 14 jastan bastap 55 jasqa kelgen eresek adamdar da bar.
Olardyń árqaısysyn kúnde tańǵy 7-den arnaıy mıkroavtobýs úılerinen alyp shyǵady. Senbi, jeksenbi sııaqty demalys kúnderi joq.
Tańǵy 8:30-9:00 taman barlyq volonterler shtabqa jınalady. Eń aldymen medıtsına qyzmetkeri volonterlerdiń dene qyzýyn ólshep, densaýlyqtaryn tekseredi. Odan keıin mindetti túrde olarǵa tańǵy as beriledi. 10:30 shamasynda qyzý jumys bastalady.
Volonterlerge kúnine 3 mezgil ystyq tamaq beriledi. Sebebi, shtab basshylyǵy olardyń ımmýnıtetiniń myqty bolǵanyn qadaǵalaıdy. Olar maska, qolǵap, antıseptıkpen qamtylǵan. Keshki 20:00 shamasynda arnaıy avtobýs volonterlerdi úılerine jetkizedi.
«Volonter – eń aldymen naǵyz patrıot. Ol óz áreketin sózimen emes isimen dáleldeıtin adam. Aınalamyzda kómekke muqtaj adam kóp, olardy nazardan tys qaldyrmaý kerek. Bul qoǵamdaǵy meıirimdilikti, qaıyrymdylyqty damytady. Adamı qundylyqtardy ósiredi», - dedi «Qazaqstan volonterlar lıgasy» QQ Almaty qalasy fılıalynyń tóraǵasy Baǵdat Anarbaeva.
Ál-Farabı atyndaǵy Qazaq ulttyq ýnıversıtetiniń «Konflıktologııa» mamandyǵy boıynsha 2 kýrs magıstranty Baǵdat Anarbaeva 7 jyldan beri volonterlikpen aınalysyp keledi.
23 jastaǵy boıjetkenniń ózi názik bolǵanmen, osy joldyń ystyq - sýyǵyna shyńdalǵan.
Onyń aıtýynsha, volonter bolýǵa kez kelgen adam umtyla bermeıdi.
«Ol úshin bireýge qaıtarymsyz kómek berýge daıyn júrek kerek. Taza nıet kerek. Adam óziniń ýaqyty men óz qamyn qurban ete alýy kerek. Biraq, kóbinese volonterlikke kelgen adam kete almaıdy. Bizdi túsinbeıtin adamdar kóp. Azyq-túlikti nege kesh jetkizdińder, nege basqa zattar joq dep renjıtinder de bar», - dedi B.Anarbaeva.
Biraq, kóp jaǵdaıda volonterler shynymen muqtaj adamdardy kórip kóńil bosap, jylap ta shyǵady.
«Bir úıge bardyq. Zeınetker qart anasy men múmkindigi shekteýli qyzy ǵana turady eken. Sońǵy azyǵymyz bitti, ne istesek eken dep oılanyp jatqanda biz barǵan ekenbiz. Ekeýi de bizdi qushaq jaıa qarsy aldy. Rızalyqtaryn bildirip, kózine jas aldy. Biraq qansha qıyn bolsa da ómirge degen renishin, úkimetke ókpesin artyp jatqan joq. Osyndaı otbasylar bizdi de qanattandyrady», - dedi Baǵdat Anarbaeva.
Al jalǵyz basty qarııa turatyn úıden volonterler toby eriksiz jylap shyqqan.
Volonterler lıgasy búginde Almatyda 1932 úıge azyq túlik sebetin, dári-dármek jetkizgen.
200 jýyq nysanda qoǵamdyq monıtorıng júrgizgen. Sonyń nátıjesinde keıbir kásipkerlerdiń TJ rejımin buzǵany áshkerelengen. 300 jýyq adamǵa jedel jeli arqyly keńes berilgen.
