Volonterlik qazaqtyń qanynda bar qasıet – Alma Aýǵanbaeva
Qazaqstandyq volonterler kún-tún demeı muqtaj jandarǵa kómektesýde. Bul ıgi ispen jastar ǵana emes, boıynda patrıottyq rýhy bar kez kelgen adam aınalysa alady. Solardyń biri Almaty qalasy Jastar resýrstyq Loft ortalyǵynyń dırektory Alma Aýǵanbaeva.
Alma Aýǵanbaevanyń aıtýynsha, adamnyń boıynda eline, jerine, týǵan-týysyna, jaqynyna degen erekshe sezim bolady. Osy qasıetterdi joǵaltpaǵan adamnan naǵyz volonter shyǵady.
«Erteden taǵylymy mol qazaq halqy «Balany jastan»,- dep rýhanı qundylyqtarymyzdy bala tárbıeleýdiń ıgiligine jumsaǵan ǵoı. ıAǵnı, volonterlik qazaqtyń qanynda bar qasıet»,– deıdi Alma Aýǵanbaeva.
Almanyń ózi kópbalaly otbasynda dúnıe kelgen. Ata-ájesiniń tárbıesin kórip ósken. Aıtýynsha, ata-anasy da olardy meıirimdi, qaıyrymdy bolýǵa baýlyǵan.
«Men úlken otbasynda tárbıelendim. Úlken kisilerdiń aqylyn tyńdap óstik. Bizdiń úıden kisi úzilmeıtin. Dastarhan jıylmaıtyn. Ata-anam kelgen qonaqtarǵa barynsha qurmet kórsetetin. Buıymtaımen kelgen kisige, mindetti túrde qol ushyn sozatyn. Osynyń bárin kórip óskendikten bolar, muqtaj jandarǵa qoldaý kórsetý meniń paryzym dep esepteımin. Volonterlik meniń ekinshi mamandyǵym desem de bolady»,– deıdi ol.
Qazirgi tańda, Alma Aýǵanbaeva basqaryp otyrǵan Jastar resýrstyq ortalyǵynda volonterler memlekettik emes jastar uıymdarymen birigip, arnaıy operatıvtik volonterler shtaby quryldy. Eriktiler kún saıyn qala boıynsha muqtaj jandarǵa kómektesýge shyǵady.
«Qazir qalada engizilgen karantınge baılanysty volonterlerdiń kómegine júginetinderdiń sany artty. Búgingi tańda 100 volonter bar. Olar muqtaj jandarǵa azyq-túlik jetkizip beredi. Biz barlyq sanıtarlyq talapty saqtaı otyryp jumys isteımiz. Volonterler qajetti qorǵanysh zattarymen tolyqtaı qamtamasyz etilgen. Ákimdik tarapynan da qoldaý bar. Bizge arnaıy avtobýs bólip berdi»,- dedi ol.
Sondaı-aq, Alma Aýǵanbaeva erikti bolý – erlikpen teń ekenin erekshe atap ótti.
