Volonterlik qazaqtyń qanynda bar - Ashat Súleımenov

ÓSKEMEN. QazAqparat – «Qazaqstan volonterleriniń alıansy» zańdy tulǵalar birlestigi respýblıkanyń túkpir-túkpirinen 5 myńǵa jýyq eriktini bir múddege toǵystyryp otyr. QazAqparat tilshisine suhbat bergen osy birlestiktiń atqarýshy dırektory Ashat Súleımenov volonterlik qyzmet jaıynda tarqatyp aıtyp berdi.

- «Qazaqstan volonterleri alıansynyń» negizgi maqsaty qandaı?

- Biz óz jumysymyzdy osydan 5 jyl buryn bastadyq. Ol kezde elimizde volonterlik memlekettik deńgeıde nasıhattalmaǵan edi. Aýqymdy sharalar da qazirgideı kóp emes-ti. Meniń oıymsha, eriktilik qazaq halqynyń qanynda bar. Ata-babamyz «Jumyla kótergen júk jeńil» dep ár sharýany birlese, keńese sheshken. «Asar» syndy saltymyz da munyń birden-bir dáleli. Birlestiktiń maqsaty – eriktilerdi tartý arqyly qoǵamǵa paıdaly is jasaý. Biz kóbinese ekologııalyq sharalarǵa qatysamyz. Respýblıkadaǵy barlyq joǵary oqý oryndarymen tyǵyz baılanys ornattyq.

- Osy ýaqytqa deıin qandaı jumystar atqaryldy?

- 2017 jyly eriktilerimiz EKSPO kórmesine baryp, pavılondarda jumys istedi. Álem boıynsha qyrkúıek aıynda ótkiziletin World Cleanup Day sharasyna jylda qatysýdamyz. Halyqaralyq WWS uıymy BUU-men birlesip, «Ǵalam saǵaty» atty jobany iske qosqan bolatyn. Biz osy jobany Qazaqstan boıynsha júzege asyrýdamyz. Sonyń aıasynda ár jyldyń naýryz aıynyń sońǵy senbisinde barlyq ǵımarattardyń, turǵyn úılerdiń jaryǵy 1 saǵatqa óshiriledi. Sebebi jaryqtyń úzdiksiz qosylyp turýynan elektr qýaty sarqylyp, tabıǵı baılyqtarymyzǵa zardabyn tıgizýde. Álbette, 60 mınýt ishinde eshqandaı másele sheshilmeıdi. Dese de osy arqyly halyqtyń sana-sezimin oıatý – bizdiń negizgi maqsat.

Sondaı-aq Shyǵys Qazaqstan jáne Aqmola oblystarynda «Birgemiz: Bilim» jobasyn qolǵa aldyq. Osy joba boıynsha oqýda ozat bolǵan eriktilerdi tartyp, 7-11 synyp oqýshylaryna UBT-ǵa daıyndalýǵa kómektesýdemiz. Aýyldy jerlerde oqyp jatqan balalarǵa esh aqysyz aǵylshyn tili, ınformatıka, fızıka, geografııa pánderin oqytýdamyz. Nátıjesinde, volonterlerden bilmegenin surap, bilimin ushtaǵan mektep túlekteri testileýden joǵary ball alýda. ShQO-ǵa 30-dan astam volonter tartyp, myńǵa jýyq balany oqyttyq.

- Birlestikterińizde qansha volonter bar?

- Jalpy uıymǵa 5 myńdaı volonter tartylǵan. Olardyń sany jyldan-jylǵa artyp keledi. Volonterlerimiz ár sharaǵa bilek sybana qatysyp, únemi uıymshyldyq tanytady.

- Karantın kezinde keıbir jobalardy júzege asyrýda qıyndyqtar týyndady ma?

- Koronavırýs pandemııasyna baılanysty ekologııalyq senbilikterge shyǵýdy toqtattyq. Biraq áleýmettik jeliler arqyly halyqqa tabıǵatty aıalap, qorshaǵan ortany lastamaı, tazalyq saqtaý qajettigi jaıly úgit-nasıhat júrgizdik. «Birgemiz: Bilim» jobasy onlaın formatqa kóshirildi. Áýel basta qıyndaý bolǵanymen ýaqyt óte kele tóselip, balalarǵa qashyqtan barynsha sapaly bilim berýge tyrystyq.

- Aldaǵy josparlaryńyz qandaı?

- Jyl saıyn bekitilgen ár jobany zaman talabyna saı ózgertip otyramyz. Keleshekte de keıbir jobalardy tolyqtyrý kózdelýde. Aldaǵy ýaqytta múmkindiginshe, respýblıkalyq, halyqaralyq deńgeıde ótetin barlyq sharalarǵa qatysqymyz keledi. Memleket basshysy Qasym-Jomart Toqaevtyń ózi 2020 jyldy Eriktiler jyly dep bekitip, «Biz birgemiz!» dep uran tastaǵan soń qalaısha tasada qalamyz?! Bizdiń uıymnyń volonterleri el múddesi úshin eńbek etip, qoǵamǵa paıdaly is jasaýǵa árkez daıyn.

- Suhbatyńyzǵa kóp rahmet!