Volonterlerdiń jumysyna teris kózqaras qalyptasyp jatyr —Dosymbetov
ASTANA. KAZINFORM — Volonterler adamdarǵa qarjylaı emes, óz qolymen, fızıkalyq turǵydan kómek kórsetip jatyr. Sońǵy ýaqytta qoǵamdaǵy volonterlerdiń qyzmetine qatysty oıymen Ulttyq volonterler front-keńsesiniń jetekshisi Aıbek Dosymbetov BIZDIÑ ORTA podkastynda bólisti.
— Qazir qoǵamda volonterdiń barlyǵyna qara kúıe jaǵylyp jatyr desek bolady, bolmasa volonterlerdiń ishki, shyn nıetimen jasap jatqan jumysyna qoǵamda bir teris kózqaras qalyptasyp jatyr. Biz volonterler osymen kelispeımiz. Óıtkeni, kez kelgen qordy alsaq, qarjyǵa kelip tireledi, qarjylaı kómek beretinder, al volonter óz qolymen, fızıkalyq turǵydan kómek kórsetedi. Jańaǵy 16 toptyń ishinde Pro-bono degen kómek bar, mysaly, dárigerler 11 jyl oqyp maman atanady ǵoı, sol óz salasy boıynsha kómek kórsetetinder Pro-bono volonterler. Mysaly, sizder jýrnalıster osy salany oqyp jatqan stýdentterge baryp tegin dáris berseńiz, sizder mysaly 2 saǵatyńyzdy qıyp volonterlik qyzmet kórsettińiz, — dedi Aıbek Dosymbetov áńgime barysynda.
Onyń aıtýynsha, volonterlik pen qaıyrymdylyq jasaýdyń arajigi bar.
— Bul barlyq jerde egiz uǵym retinde júredi. Qarjy uıymdary qarjy bóledi, sol bólingen qarjyǵa alynǵan azyq-túlik, baspana alyp berip jatyr. Bunyń barlyǵy volonterlerdiń jumysynyń kúshimen, halyqtyń qarjysymen bir januıaǵa baryp, kómegin berip jatady. Osy jaǵdaıda barlyǵy birdeı volonter bolyp ketken, qaıyrymdy jandar da volonter bolyp kete beredi. Osy jerde ashyp aıtqym keledi, volonterlerdiń alaıaqtyqqa, basqa da qylmystyq áreketke barýyna jol joq. Volonterlerdiń qyzmeti aqshamen baılanysty emes. Nege qazir volonter degen sózdi jıi qoldanyp ketti?! 2020 jyl Memleket basshysynyń bastamasymen volonter jyly bolyp jarııalandy. Sol kezde pandemııa kelip, volonterler batyrlardyń keıpin qalyptastyrdy. Qoǵamda volonter týraly artyq oılaý, sógý, ǵaıbat sóz aıtý degen halyqta eshqandaı oı bolǵan joq, — deıdi ol.
Buǵan deıin habarlanǵandaı, BIZDIÑ ORTA podkastynda qaıyrymdylyq jasaý máselesi sóz boldy. Suhbat qonaqtarynyń biri «Asar-Úme» qaıyrymdylyq qorynyń jetekshisi Ashat Nurmashev qaıyrymdylyq qor qyzmetiniń qazirgi hálin sóz etti.