Volonterlerdiń ómiri men densaýlyǵyn qorǵaý júıesi engiziledi
ASTANA. KAZINFORM – Volonterlerdiń ómiri men densaýlyǵyn qorǵaý júıesin engizý máselesi pysyqtalyp jatyr. Bul týraly Mádenıet jáne aqparat mınıstrliginen málim etti.
- Jalpy, elimizde volonterlik belsendi damyp jatyr. Ulttyq front-ofıs pen 20 óńirlik front-ofıs nysanynda ınfraqurylym qurylyp, biryńǵaı Call-ortalyq pen biryńǵaı Qazvolunteer.kz onlaın platformasy jumys isteıdi. Belsendi volonterlerdiń sany 300 myńǵa jýyqtady. Onyń 6 myńy - «kúmis» volonter. Volonterlik uıymdardyń sany – 810. Volonterlik salady 130 myńnan astam is-sharalar men aktsııalar ótkizilip, 300 myńǵa jýyq adam qamtyldy. Olar 2 mln adamǵa kómek kórsetti, - dedi vedomstvodan agenttiktiń resmı saýalyna oraı.
Mınıstrlik málimetinshe, 2020 jyldan bastap «Jyl volonteri» halyqaralyq syılyǵy beriledi. Alty jyl ishinde syılyq Qazaqstan, Ázerbaıjan, Qyrǵyzstan, Túrkııa, Ózbekstan jáne Reseıden kelgen 297 volonterge berildi. Sonymen qatar 2023 jyldan bastap jyl saıynǵy úkimettik emes uıymdarǵa arnalǵan syılyqaqy tetigi aıasynda «Volonterlik bastamalardy damytý jáne qoldaý» baǵyty boıynsha volonterlik uıymdarǵa syılyqaqy berile bastady. Úsh jylda 15 uıym atalǵan syılyqaqy ıegeri atandy.
- Memlekettik deńgeıde volonterlik qyzmetti yntalandyrý jáne qoldaý boıynsha keshendi jumys júrgizilip jatyr. Bıyl 56 volonterlik joba, volonterlik bastamalardy iske asyratyn 60 shaǵyn grant oryndalyp jatyr. Sondaı-aq, zańnamalyq deńgeıde volonterlik ótildi azamattyq qyzmetke ornalasý kezinde esepke alý jáne bilim berý júıesinde volonterlik tájirıbeni eskerý, memlekettik marapattaý tetikterin keńeıtý, sondaı-aq volonterlerdiń ómiri men densaýlyǵyn qorǵaý júıesin engizý qarastyrylyp jatyr. Sonymen qatar volonterlik qyzmetti esepke alýdyń biryńǵaı tsıfrlyq tetigin – Volonterdiń tsıfrlyq pasportyn engizý josparlanyp otyr, - dedi mınıstrlikten.
Buǵan deıin Volonterdiń tsıfrlyq pasporty jyl sońyna deıin engiziletinin jazǵan edik.
