Volonterler shyn muqtajdarǵa kómek kórsetti – Aıgúl Túrkına
Onyń aıtýynsha, volonterler shyn máninde kómekke muqtaj jandarǵa qolushyn sozdy.
Koronavırýspen kúres halyqqa ońaı tıgen joq. Karantın kezinde dári-dármek, jaǵdaıy qıyn otbasylarǵa azyq-túlik jetispeı jatty. Osyndaı qıyn ýaqytta Qazaqstan halqy BQO assambleıasy janynda bas biriktirgen 44 volonter úsh baǵytta ýaqytpen sanaspaı, júgirip júrip, qyzmet atqardy. Eń aldymen kelgen gýmanıtarlyq kómekti tıisti jerine jetkizýmen aınalysty. Ekinshiden, dárihanalarǵa ne qajet ekendigin bilip otyrdy. Úshinshiden, aýrýhanalardaǵy jaǵdaıdy da nazardan tys qaldyrǵan joq.
«Qaı jerde kúrdeli másele týyndasa, sony tez sheshýdiń jolyn qarastyryp otyrdyq. Men ózim «Qoǵamdyq kelisim» KMM dırektorynyń orynbasary retinde volonterlik jáne kásipkerlik máselelerine jaýapty edim. Bul jumys soǵan dóp keldi. Dostyq úıinen gýmanıtarlyq júkterdi jınaý úshin arnaıy oryn bólindi», deıdi Aıgúl Serikqyzy.
Assambleıanyń uıymdastyrýymen 13 qaıyrymdylyq kerýeni jol tartyp, 1 myńnan astam otbasyǵa 20 mıllıondaı teńgeniń járdemi berildi.
Bul jerde aıta ketetin jaıt, emhanalardan, mektepterden jáne basqa áleýmettik mekemelerden naǵyz kómekke muqtaj otbasylardyń tizimi alyndy. Eriktiler sol jerlerge baryp, jaǵdaıdy óz kózderimen kórdi. Jáne bir jolǵy kómekpen shektelmeı, sol otbasyny udaıy baqylap turdy. Mysaly, bir úıdegi eki múgedek jannyń syrtqy álemmen baılanysa almaı, oqshaý qalǵan tusy boldy. Mine, volonterler olardy nazardan tys qaldyrmaı, kúnbe-kún kerekterin jetkizip otyrdy.
Tipti qıyn jaǵdaıdy kózben kórgennen keıin jaıly úılerde turatyn jas kásipkerlerdiń ómirge kózqarasy ózgerdi deýge bolady.
A.Túrkınanyń sózine qaraǵanda, volonterler qaýip-qaterdiń ortasynda júrdi. Aıtalyq, «Aqjaıyq adaldyq alańy» jobalyq keńsesinde qyzmet atqaratyn Serik Muqashev oblystyq juqpaly aýrýlar aýrýhanasyna óz erkimen baryp, bir aıdaı sanıtar qyzmetin atqardy. Ol sanıtar bolyp qana qoımaı, aýrýhananyń ishinen ne kerektigin bilip, eriktilerge habarlap turdy.
Sol sekildi máıithanada áıelderdiń qolmen jýyp, úlgere almaı jatqanyn kórgen volonterler arnaıy qurylǵynyń kómegimen sol ǵımaratty tazartyp berdi.
Sondaı-aq aýdandarǵa barǵan eriktiler kóp balaly, az qamtylǵan otbasylarǵa qaıyrymdylyqtaryn aıaǵan joq. Mysaly, Jańaqala aýdanynda osyndaı úsh otbasyn qudyq soǵyp, aýyz sýmen qamtamasyz etti. Sol sekildi Syrym aýdany Kózdiǵara eldi mekeninde aýyz sý jetispeıtinin kórgen jigitter eki el qudyǵyn qazyp berdi. Onyń bireýi mektep balansyna berilse, ekinshisi aýyl úlkenine tapsyryldy.
«Biz sanıtarlyq talaptardy qatań saqtap, kúsh biriktirsek qana indetti jeńe alatynymyzdy ýaqyt kórsetti. Sonymen qatar shet elden kelgen medıtsınalyq qural-jabdyqtardy, qorǵanys quraldaryn ózimizde nege sapaly jasamasqa degen oı keldi. Alda indettiń ekinshi tolqyny kelýi múmkin, balalarǵa da qıyn tııýi yqtımal degen boljam aıtylýda. Sondyqtan biz bárine de daıyn bolýymyz kerek», dedi QazAqparat tilshisine A.Túrkına.
